Ғаллаоролда сел оқибатида жабр кўрган хонадонлар ҳолидан ким хабар олади?

Жамият 19:34 / 16.04.2019 20421

5-7 апрель кунлари юртимиз ҳудудларида кучли ёғингарчилик бўлиб ўтди. Ушбу ёғингарчилик натижасида айрим вилоятларда сел тошқини туфайли бир неча хонадон зарар кўрди. Таҳририятга келган навбатдаги мурожаат ҳам айнан шу мавзуда.

“Ҳурматли таҳририят ижодкорлари, сизга Жиззах вилояти Ғаллаорол тумани Молтоб ҚФЙ Янгиқишлоқ кўчасида сел тошқини сабабли қаттиқ зарар кўрган фуқаролар мурожаат қилмоқдамиз. 5-7 апрель кунлари ёққан ёмғирлар натижасида бизнинг Янгиқишлоқ кўчасида бир неча хонадонларга ёмғир сувлари кириб , олти хонадон зарар кўрди. Табиий офатдан сўнг кўчада қолдик. Орадан неча кун ўтган бўлса-да, на туман ҳокимлиги, на керакли ташкилотлар бизга кўмак қўлини чўзди. Айни кунларда ҳар биримиз яқин қариндошларимиз хонадонларида вақтинча яшаб турибмиз. Бу эса кўплаб қийинчиликларни юзага келтирмоқда. Яшаш жойларимиз тикланишида ҳамда зарар кўрган ҳовли ва уйларимиз тезроқ тартибга келтирилишида ёрдам беришингизни сўраймиз”, дейилади унда.

Мазкур мурожаатни ўрганиш мақсадида кўрсатилган манзилга йўл оламиз. Янгиқишлоқ кўчасидаги зарар кўрган хонадон соҳибларининг маълум қилишича, талофатларга кучли ёмғир ёғиши натижасида “Тошкент-Самарқанд” тезюрар “Афросиёб поезди” темир йўли остидан ўтган қувурларга ёмғир суви билан оқиб келган шох-шаббалар тиқилиб қолиши сабаб бўлган. 

Сел оқибатида Манзура Отабоеванинг уйи буткул тошқин остида қолган. Уйнинг деворлари сел босимига дош беролмай нураган. Натижада хонадон қаттиқ зарар кўрган.

“Сув кутилмаганда жуда шиддат билан келди, уйдан ҳеч нимани олиб чиқолмадик.Бор нарсамиз оқиб нобуд бўлди. Паррандаларимиз, ҳовлидаги кўчат ва экинларимизга зарар етди. Хуллас, эгнимиздаги кийим билан қолдик. Ҳокимиятдан келишди, ўрганамиз, ўн беш кунда жавобини айтамиз, дейишди. Ёрдам берамиз, дейишди, лекин ҳеч қандай ёрдам кўрсатилмади”,- дейди Ҳамидулло Отабоев.

Табиий офатдан жабр кўрганларнинг айтишича, уларнинг хонадонлари “Афросиёб” поезди ўтувчи йўлга жуда яқин пастликда жойлашган. Тезюрар поезд йўли остидаги сел ўтказувчи қувурлар эса жуда тор ва кичик, шу боис сув тошқини содир бўлган. 

“Сел келганига саккиз кундан зиёд вақт ўтди. Бирон мутасадди келиб ҳолинг нима деб сўрамайди. Сел келиши оқибатида бор будимиздан айрилдик. Шу талофатнинг эртасига туман ҳокими Жалолиддин Оқбоев келиб, бизга қўлдан келганича ёрдам беришни ваъда қилди. Аммо мана орадан шунча кун ўтган бўлса ҳам бирон ёрдам кўрмадик. Икки кундан кейин келган “тез ёрдам” шифокорлари керакли дориларни ёзиб беришди, ўзимиз бориб дорихоналардан сотиб олдик. ДСЭНМдан келган шифокорлар эса тўрт кундан кейин келиб ҳудудни дорилаб кетишди”,-дейди Ҳ.Отабоев.

Маълум бўлишича, қишлоқда яшовчи эркакларнинг асосий қисми ишсиз. Уларнинг даромади эса томорқадаги деҳқончилик ортидан. 

“Болаларимиз мактабга ҳам боришмаяпти, рўзғорда ҳеч нарсамиз қолмаган. Ҳаммасини сув оқизиб кетди. Нима қилишга ҳайронмиз. Айни кунда оила аъзоларимиз билан яқин қариндошларимизникида яшаяпмиз. Ҳеч бўлмаса озиқ-овқатдан ёрдам қилишса бўларди. Сизга ёлғон-бизга чин, болаларнинг мактабга кийиб борадиган пойабзали ҳам йўқ”, - дейди селдан жабр кўрган хонадонлар бекалари.

Бу масала бўйича изоҳ сўраб “Молтоб” ҚФЙ раиси Муртазо Оқбўтаевга мурожаат қилдик.

“Сиз айтаётган масаладан хабаримиз бор. Албатта, биз керакли чораларни кўряпмиз. Айни кунгача канал ва зовурларни тозалаш ишлари билан бандмиз. Табиий офатдан зарар кўрган биргина Янгиқишлоқ кўчасидагилар эмас. Қишлоғимиз марказидаги кўприкни ҳам сел ювиб кетди. Шуни тиклаш чораларини кўряпмиз. Энг қизиғи, ҚФЙ биноси ҳам селдан зарар кўрди. Кўрганингиздек, ҳаммамиз бино ҳовлисидамиз. Биз додимизни кимга айтайлик? Қишлоқ аҳли қараб турмайди. Мана, куни кеча тошқиндан қаттиқ зарар кўрган Манзура Отабоева хонадонига ички ишлар томонидан берилган икки кило гўштни олиб бориб бердик. Ҳарна ёрдам бўлсин дедик”,- дейди Муртазо Оқбўтаев.

Ғаллаорол тумани ҳокими Жалолиддин Оқбоев вазиятга шундай изоҳ берди: 

“Бу хабарни эшитгач, ўша куниёқ “ Молтоб” ҚФЙдаги зарар кўрган хонадон соҳиблари билан учрашдим. Зарар етган жойларни бориб кўрдим. Вазият билан танишиб дарҳол у ердан фуқароларни хавфсиз жойга кўчирдик. Аслида зарар кўрган хонадон соҳиблари у ерда яшашлари мумкин эмас . Тезюрар поезд йўли яқинидаги табиий офатдан зарар кўрган хонадон соҳибларининг ҳар бирига янгитдан уй қуриб олишлари учун ер майдони таклиф қилдик. Фақатгина шу билан чекланиб қолмай, уларга уйларни қуриб битказишлари учун қурилиш моллари ҳам ажратилади. Шунинг билан бир қаторда деҳқончилик қилишлари учун ҳам Янгиқишлоқ кўчасидаги ер майдонларини ўзларида қолдирамиз. Шу масалада вилоят ҳокимлигига ҳам амалий ёрдам кўрсатишини сўраб хат билан мурожаат қилганмиз. Жиззах вилоят ҳокимлиги томонидан ҳам албатта ёрдам кўрсатилади. Таъкидлаб ўтиш жоиз, ёғган ёмғирлар натижасида бир қанча кўприкларимизга ва экин майдонларимизга зарар етган. Шу боис фавқулодда вазиятлар бошқармаси билан ҳамкорликда ишлаяпмиз , тозалаш ишларига қўшимча техникаларни ҳам жалб қилганмиз. Албатта, мурожаатчиларни тушунаман, уларнинг дардини ҳис қиламан, туман ҳокимлиги бу воқеага эътиборсиз эмас. Қўлимиздан келганча, одамийлик нуқтаи назаридан ҳам кўмак беришимиз зарур деб ўйлайман”.

Табиий офат ўз номи билан “офат”. Аниқланишича, туман бўйича 157 та хонадоннинг томорқаси ва 56 та хонадон сел тошқинидан зарар кўрган. Туман ҳокимлиги томонидан тузилган комиссия хулосаларига кўра, айни кунларда табиий офатдан кўрилган зарарлар ҳисоблаб чиқилиб, керакли миқдорда ёрдам кўрсатилади. 

Шу ўринда бир мулоҳаза... Шу каби ҳолатларда қишлоқ ва фуқаролар йиғини вакилларининг ўрни қани? Маҳалла ва қишлоқ оқсоқолларининг вазифаси фақатгина ташкилий ишлар билан шуғулланиб (аҳолини кўча тозалаш-у газ ва электрга ўз вақтида пул тўлаб қўйишга даъват қилиш) эмас, балки яхши ва ёмон кунларда ҳам фуқароларни бирдамликка чақириш, улар ҳолидан хабар олиб, дардига малҳам бериш эмасми? Пойабзали йўқлигидан мактабга бормаётган болалар ёки қозон қайнатишга имкон тополмаётган оилалар ҳолидан хабар олиш жуда катта “муаммо” эмас...  

Гулчеҳра ШАРИПОВА

Кўпроқ янгиликлар