“Вақф” фонди нон ишлаб чиқаришни бошлади

Жамият 16:30 / 15.04.2019 11984

Март ойида 16 гектар ер майдон ва бинолар Ўзбекистон мусулмонлари идораси томонидан "Вақф" фондига беғараз берилганди. Ушбу ҳудудда қисқа муддат ичида нон ва нон маҳсулотларини ишлаб чиқариш цехи барпо этилди, деб хабар берди "Вақф" хайрия жамоат фонди матбуот хизмати.

“15 апрель куни нон цехи ўз фаолиятини бошлади ва дастлабки нон маҳсулотлари Ўзбекистон мусулмонлари идораси раиси, муфтий Усмонхон Алимов ҳазратларининг дуои хайрлари ила халқимизга тортиқ қилинди”, дейилади хабарда.

Фонд раҳбари Искандар Халиловнинг сўзларига кўра, мазкур цехда ишлаб чиқарилган дастлабки нон маҳсулотлари ишчи-хизматчилар, миришкор деҳқонлар ва узоқ-яқиндан келган меҳмонларга хайрия тариқасида тарқатилди.

Мутахассис Луқмон Аблақуловнинг айтишича, цехда тўққиз турдаги нон маҳсулотлари ишлаб чиқарилиб, дўконлар орқали сотилади ҳамда тушган фойда ҳисобидан меҳрибонлик, қариялар ва ногиронлар уйларига хайрия тариқасида ҳам улашилади. Шунингдек, нон таркибида соғлиқ учун зарур ва фойдали бўлган оқсил, углевод, турли витаминлар, минерал тузлар, шунингдек, темир, кальций, фосфор ва бошқа моддалар мавжуд.

Нон ва нон маҳсулотларини ишлаб чиқаришдан кўрилган фойда масжид-мадрасаларни обод этиш, ёрдамга муҳтож ва ногиронлиги бор шахсларни ижтимоий қўллаб-қувватлаш ишларига сарфланади. 

 

Кўпроқ янгиликлар