Туркманистон 3 йиллик танаффусдан кейин яна Россияга газ етказа бошлади – ОАВ 

Жаҳон 23:03 / 15.04.2019 8252

Туркманистон 15 апрелдан 3 йиллик тўхташдан кейин яна Россияга табиий газ етказиб беришни бошлади. Бу ҳақда Туркманистон нефть-газ соҳасидаги манбага иқтибос келтирган ҳолда “Ориент” туркман нашри хабар берди. 

Хабарда таъкидланишича, “газ етказилиши 2016 йил бошида “Газпром” томонидан тижорий танаффус олингандан кейин 2003 йилдаги 25 йиллик шартнома доирасида яна йўлга қўйилган”. 

Россия сотиб олаётган газ ҳажми ва нархи маълум қилинмаган. 

2018 йил кузидан бери Россияга газ етказилиши бўйича олиб борилаётган музокаралардан олдин “Газпром” ва “Туркмангаз” ўртасида келишмовчилик чиққан. Томонлар бир неча йил давомида бир-бирлари устидан халқаро арбитражга арз қилиш билан таҳдид қилишган.  

2015 йил “Туркмангаз” “Газпром”ни тўловни амалга оширмаётганликда айблаб, Россия концернини тўловга қобилиятсиз деб эълон қилган. Бунга жавобан “Газпром” Туркманистондан сотиб олинадиган газнинг нархи қайта кўриб чиқилиши ва ортиқча тўланган 5 млрд долларнинг қайтарилишини талаб қилган.  

2016 йил бошида “Газпром” туркман газини сотиб олишни тўхтатган ва кейинроқ шу йил “Ўзбекнефтгаз” билан Ўзбекистондан газ етказилиши бўйича шартнома имзолаган.

Кўпроқ янгиликлар