Кейннинг жароҳати ва Гвардиоланинг хавотири. «Сити» ЕЧЛсиз қоладими?

Спорт 15:00 / 10.04.2019 16044

Чемпионлар лигасининг чорак финалида Англиянинг энг яхши икки жамоаси турлича ўйин кўрсатди: «Ливерпуль» «Порту» майдонида хотиржамлик билан ғалабага эришган бўлса (2:0), «Манчестер Сити» «Тоттенҳэм» майдонидан мағлубият билан қайтди (0:1).

Чемпионлар лигаси, 1/4 финал. Биринчи ўйинлар
«Тоттенҳэм» (Англия) - «Манчестер Сити» (Англия) - 1:0 (0:0) 
Гол: Сон Хин Мин, 78.
Аниқ ижро этилмаган пенальти: Агуэро, 13 (дарвозабон)
«Тоттенҳэм»: Ллорис, Триппьер, Алдервейрелд, Фертонген, Роуз, Эриксен, Уинкс (Ваньяма, 81), Сон Хин Мин, Сиссоко, Кейн (Лукас Моура, 58), Алли (Льоренте, 87). 
«Манчестер Сити» (Англия): Эдерсон, Уокер, Ляпорт, Отаменди, Делф, Фернандинью, Гундўған, Сильва (Сане, 89), Стерлинг, Маҳрез (Де Брейне, 89), Агуэро (Габриэл Жезус, 71). 
Огоҳлантиришлар: Роуз, 12. Ляпорт, 28. Маҳрез, 59. 
Ҳакам: Кайперс (Нидерландия).
9 апрель. Лондон. «Уайт Ҳарт Лейн» стадиони.
Жавоб ўйини - 17 апрель

Уйдаги дебют
«Тоттенҳэм» ва «Манчестер Сити» ўзаро ўнлаб ўйинлар ўтказишган, Маурисио Почеттино ва Хосеп Гвардиола футболчилик вақтидаёқ «Эспаньол» ва «Барселона»да кўп марта бир-бирига қарши тўп тепган. Навбатдаги қарама-қаршилик арафасида эса энг кўп муҳокама қилинган мавзу мураббийлар ва жамоалар эмас, мезбонларнинг янги стадиони бўлди. Ўйиндан олдин «шаҳарликлар» етакчиси Кевин де Брюйне бу мавзуга беписандлик билан қараб, «барчанинг ҳам ўз стадиони борлигини, шу туфайли ўйин қандай стадионда бўлиши аҳамиятсизлиги»ни қайд этиб ўтди. Лондонликлар эса янги стадиондаги дебютда ғалаба қозонишларига ишонишаётганди.

«Эҳтимол, «Сити» футболчилари бизнинг ҳиссиётларимизни тушунишмаётгандир, чунки улар ҳамиша ўз уйларида ўйнаб келишган. Биз эса қарийб икки йил давомида ўзимизга бегона стадионда тўп сурдик», деди ҳаяжон билан Сон Хин Мин. Кейинги куни эса «Тоттенҳэм» сайти Кейннинг сўзларини келтирди: «Уэмбли»да бир қанча ўйинлар ажойиб ўтган, аммо ҳеч қачон биз ўз уй стадионимизда ўйнаётганимизни ҳис қилмаганмиз. Биз бундай энергиядан фойдаланишимиз ва ғалаба қозонишга ҳаракат қилишимиз зарур».

«Сити»га қарши бу ўйинни фаолиятидаги энг муҳимларидан бири сифатида ҳисоблаган Почеттино футболчиларидан айнан шундай кайфиятда ўйинга тайёрланишни талаб қилганди. 

Льорис метин қоя

Ўйин дебютида майдон эгалари олдинга ташланишди, Сиссоко жарима майдонига кириб борди ва Аллининг узун пасини дарвоза томон йўллади, тўп дарвоза тўсини юқорисидан ўтиб кетди. Кейин эса арена тарихига киргулик воқеа содир бўлди. Аввалига бурчак зарбаси белгилаган ҳакам Бьерн Кайперс видеоҳакамдан билдирги олгач, видеотакрорни мустақил кўриб чиқди ва Стерлингнинг зарбаси Роузнинг қўлига теккан деб топиб, 11 метрлик нуқтани кўрсатди.

Трибуна жим бўлиб қолди, аммо Льорис Агуэронинг зарбасини бартараф этганидан кейин барча оёққа турди.

Бу ерда стадион босими аргентиналик ҳужумчига таъсир кўрсатмадими? Статистикага қарайдиган бўлсак, гап фақат бунда эмаслигини кўришимиз мумкин. Жорий йилда Льорис қўриқлаётган дарвоза томон уч марта пенальти қўйилган ва франциялик дарвозабон Варди, Обамеянг ҳамда Агуэро каби топ ҳужумчиларнинг зарбаларини қайтарган. Льорис 2006 йилда Европага келган Кун Агуэрога икки марта пенальтидан гол уришга йўл қўймаган ягона дарвозабон. Льорис чапга сакради, Агуэро кейинги икки мавсум давомида асосан шу томонга тепган ва бирор марта адашмаганди.

Кейннинг жароҳати
Кейинроқ маълум бўлишича, ҳужумчиларни гипноз қилиш Эдерсоннинг ҳам қўлидан келаркан. Бразилиялик дарвозабон биринчи бўлим ўрталарида Кейн оддий вазиятда гол уришига йўл қўймади. Бу Агуэро пенальти уролмаган вазиятдан кам эмасди. Кейн қарор қабул қилишда бироз кечикканди. «Тоттенҳэм»нинг ҳужум чизиғи бахтсиз ҳодисалар туфайли кучсизланди. Иккинчи бўлим бошларида қанотда ҳаракатланаётган Дельфни қарши олган Кейн оёғига кучли зарба қабул қилиб олди. Натижада Почеттино уни майдондан олди, англиялик футболчи энди ҳассаларга таяниб юришга мажбур.

Мураббийларнинг футболчи алмаштиришлари ўйинга турлича таъсир кўрсатди. Гвардиола Агуэро ўрнига Габриэл Жезусни туширди. Охирги икки трансфер ойнасида янги футболчи сотиб олмаган лондонликлар сафидаги энг кучли захира эса Лукас Моура эди ва у Кейннинг ўрнига туширилгач, жамоа 4-4-2 схемасида ўйнай бошлади. «Тоттенҳэм» рақиб жарима майдонига босимни оширди, вазиятлардан бирида тўпни ўзига бўйсундириш чоғида ўта ишончсиз ҳаракат қилган Сон Хин Мин алалоқибат ўша ҳужумни ўзи гол билан якунлади.

Ўйиннинг охирги дақиқаларида «шпорлар» Аллидан ҳам айрилишди, аммо ҳозир Лондонда байрам, бир ҳафтадан кейин янги ўйин бўлади.

Тишсиз аждарлар. «Ливерпуль» бир оёғи билан яримфиналда

«Ливерпуль» (Англия) - «Порту» (Португалия) - 2:0 (2:0)
Голлар: Кейта, 5 (1:0), Роберто Фирмино, 26 (2:0)
«Ливерпуль»: Алиссон, Александр-Арнолд, Ловрен, ван Дейк, Милнер, Ҳендерсон, Фабинью, Кейта, Салоҳ, Роберто Фирмино (Старриж, 82), Мане (Ориги, 73). 
«Порту»: Касильяс, Макси Перейра (Фернанду, 77), Фелипе, Эдер Милитау, Теллес, Корона, Данилу Перейра, Оливер Торрес (Бруну Кошта, 73), Отавиу, Марега, Соарес (Брахими, 62). 
Огоҳлантиришлар: Соарес, 17. Фелипе, 61. 
Ҳакам: Матеу Лаос (Испания).
9 апрель. Ливерпуль. «Энфилд» стадиони.
Жавоб ўйини - 17 апрель.

Яримфиналсиз 15 йил
ЕЧЛнинг чорак финалидаги «Ливерпуль» - «Порту» жуфтлиги бу босқичдаги энг интригасиз жуфтлик эди. Ўтган мавсум нимчорак финалида «аждарлар» ўз майдонида 0:5 ҳисобида ютқазган (жавоб ўйинида 0:0), шундан келиб чиққан ҳолда бу жуфтлик тақдири олдиндан маълум деб ҳисобланилаётганди. 

Бу сафар ҳам португаллар учун чорак финал армон бўлиб қоладиган бўлди - жамоа 15 йилдан буён ЕЧЛнинг бу босқичига чиқа олмаяпти. 15 йил муқаддам Жозе Моуриньо «Порту» билан нафақат яримфиналда, балки финалда ҳам ўйнаб, «Монако»ни мағлуб этган ҳолда бош совринни ютиб олганди. «Ливерпуль» рақибнинг бу омадсиз сериясини якунлашга рози эмасди.

АПЛнинг ўтган турида «Саутҳэмптон»ни мағлуб этиб (3:1), турнир пешқадамлигини қайтариб олган бўлса-да захирасида бир ўйин бор «Сити»дан узоқлашиб кетолмаётган «Ливерпуль» ЕЧЛда яримфинални бир ўйиндаёқ ҳал қилиб, кейин яна бор эътиборини ички чемпионатга қаратиш учун майдонга тушди.

Ўз навбатида, «Порту» ҳам жавоб ўйини расмиятчиликка айланиб қолмаслиги учун бор кучи билан ҳаракат қилди. Айниқса меҳмонларнинг малилик ҳужумчиси, ЕЧЛнинг жорий мавсумида 6 гол уришга эришган Марега бу ўйинда ҳам ҳаммадан кўпроқ ҳаракат қилди. Унинг биринчи зарбаси дарвоза тўсини устидан ўтиб кетди, кейинги ҳужумда унинг зарбаси йўлига ван Дейк тўғаноқ бўлди. Танаффус арафасида Марега яна олдинга ташланди, бу вазиятда мерсисайдликлар голдан қутулиб қола олмайдигандек кўринганди, аммо Беккер бунга қарши бўлди: бразилиялик дарвозабон аввалига Мареганинг зарбасини оёқлари билан тўсди, Мареганинг қайтган тўпга берган зарбаси ҳам дарвозабондан ўтмади.

Кейта ва Фирминьонинг голлари

«Порту»нинг биринчи бўлим охиридаги фаоллиги тушунарли эди - бунгача мезбонлар икки бор Касильяс қўриқлаётган дарвозани ишғол қилишга улгуришганди. Биринчи гол ўйиннинг 5-дақиқасидаёқ урилди - Мане чап қанотдан жарима майдонига кириб, Фирминьога пас узатди, у эса Кейтага. Кейтанинг зарбаси меҳмонлар ҳимоячиси Торреснинг оёқларига тегиб, рикошет орқали дарвоза тўрига бориб тушди. Бу гол гвинеялик футболчининг «Ливерпуль»даги иккинчи голидир, у бир неча кун олдин «Саутҳемптон»га қарши ўйинда дебют голини нишонлаганди.

Бўлим ўрталарида Фирминьо мезбонларнинг иккинчи голини урди - Ҳендерсон ўнг қанотда югурган Александр-Арнольдни тўп билан таъминлади, вингер эса дарвозабон ҳудудига тўпни аниқ ташлаб берди, бўш дарвоза қаршисида бўш қолган бразилиялик футболчи осонлик билан дарвозани ишғол қилди.

Ўйин давомида Салоҳ ҳисобни йириклаштириш учун уринди, аммо мисрлик футболчи Касильясни доғда қолдиришга муваффақ бўлолмади - испаниялик посбон бир сафар унинг зарбасини ушлаб олди, бошқа сафар Салоҳ яккама-якка вазиятда тўпни олис бурчакка тўғри йўналтиролмади. 

Сержи Консейсау «Порту»ни кейинги 15 йилликда илк марта яримфиналга олиб чиқиш учун ҳеч нарса қилолмади. Иккинчи бўлимда Беккер биринчи бўлимдагидан камроқ ишлади, керакли ҳисобга эришиб бўлган «Ливерпуль» тўпни ишонч билан назорат қилди, меҳмонлар рақиб мудофаасидан ўта олишмади. Юрген Клопп гол ўтказмасдан эришилган ғалабадан кейин яримфинал сари катта қадам ташлади. 

Инглизларда имконият қандай?

Премьер лига клублари трансферлар учун «вагон-вагон» пул сарфлайди, телеканаллар билан рекорд даражадаги шартномалар тузади ва ўз стадионларидаги томошабоп ўйинлар билан мағрурланади.

Аммо инглиз клублари халқаро майдонда катта ғалабаларга эриша олишмаяпти. 10 йилдан буён ЕЧЛнинг яримфиналига бирданига икки инглиз жамоаси чиққани кузатилмади. Умуман, 2009-10 йилги мавсумдан буён яримфиналга фақат 5 британ клуби йўл олган.

Аммо кейинги йилларда инглиз клубларида ҳам ўсиш кузатила бошланди. Бу «Манчестер Сити» эвазига бўлмоқда. Гвардиола жамоаси ўтган мавсумда 100 очко тўплади ва камида битта рақибини ўз бошидан баланд сакрашга мажбур қила олди. Бу мавсумда «Ливерпуль» «Манчестер Сити» даражасига деярли тенглашиб олди. «Деярли», чунки қизиллар бу мавсумда «шаҳарликлар»дан фарқли равишда 4та эмас, 2та турнирда кураш олиб бормоқда. Англия Лигаси Кубоги ва Англия Кубогини эрта тарк этган Клопп аллақачон танбеҳ олиб бўлди ва қолган икки турнирда муваффақиятли иштирок этиш учун интилмоқда. 

Қизиллар ЕЧЛ яримфинали масаласини амалда ҳал қилишди. Нисбатан осон рақибга қарши ўйнаган жамоа куч ҳам тежади ва шу ҳафта охирида АПЛ доирасида «Челси»га қарши кечадиган ўйинга йўқотишларсиз боради. 

Англияда ҳамиша «Тоттенҳэм» устидан совринсизлигини пеш қилиб кулиб келишган. Энг охирги ҳазиллардан бири Капу ва Гомес «Уотфорд» билан собиқ жамоаси «Тоттенҳэм»дан олдинроқ Англия Кубогига чиққани ҳақидадир. Бу ҳақдаги энг машҳур ҳазиллардан бирида «Брюгге тубидаги пистирма» фильмидан иқтибос келтирилади: «Сен чўкиб кетмадинг, аммо чўққига ҳам чиқолмадинг. Худди «Тоттенҳэм» каби».

Лондонликлар «Манчестер Сити»ни ҳам пастга тортмоқда. Жамоа Англияда чемпионлик пойгасини тарк этди, аммо мартга қадар кўклар ва қизиллар билан бир даражада ўйин кўрсатиб келишганди. Албатта, агар бу жамоада «Сити» каби мўлжал бўлмаганида бундай савияда ўйин кўрсатилиши амримаҳол эди.

Энди эса Гвардиола ўз буюклигига асир тушган - у бошқа жамоаларни ҳам кучайтириб, ўзи билан чўққига олиб чиқмоқда ва бу жамоалар уни чалиш пайидан бўлмоқда. Ўтган йилги «Тоттенҳэм» «Манчестер Сити»ни мағлуб этолмаган бўларди. «Шпорлар» 2017-18 йилги мавсумдаги икки ўйинда жами 2:7 ҳисобида ютқазганди.

Албатта, Льорис Агуэронинг пенальтидан берган зарбасини қайтарганида матнда бошқа сарлавҳа бўлиши мумкин эди. Агар бу ўйинда видеотакрорлардан фойдаланмаганида ва ҳакам пенальти белгиламаганида ўйинда воқеалар ривожи бутунлай бошқача кечиши мумкин эди. Лекин «Сити» гол уролмади ва дарвозага зарбалар бериш бўйича кўрсаткичда ҳам ортда қолди. 

Ҳали олдинда жавоб ўйини бор, аммо Гвардиола асабийлашишни бошлади. У футбол даҳоси бўлгани учунгина тўртта совринни бериб қўяверишмайди.

Кўпроқ янгиликлар