Паданг - аномалиями ёки оптик иллюзия?

Lifestyle 22:39 / 09.04.2019 20163

Бойсун туманининг Паданг қишлоғида ақлингизни шошириб қўювчи ажойиб жой мавжуд бўлиб, у ерда сирли табиий аномалия ҳодисасига гувоҳ бўлиш мумкин. Маҳаллий аҳоли "магнитли жой" деб атовчи бу тепаликка чиқишда физика қонунларига қарши ўлароқ, мўъжиза рўй беради. Uzbekistan.travel ушбу маскандан фоторепортаж билан бўлишди.

Юзлаб йиллар аввал маҳаллий халқ тепаликда қолдирилган буюм пастга тушиш ўрнига юқорига қараб ҳаракатланишига гувоҳ бўлган. Ғаройиб, шундай эмасми?

Мутлақо тушунарсиз сабабларга кўра, муайян ҳудудда сув юқорига қараб оқади, ундаги тўплар ҳам юқорига қараб ҳаракатланади, двигатели ёқилган автомобиль эса пастга қараб тушиш ўрнига тепаликка қараб кўтарилади.

Асрлар давомида бу ҳодиса кенг омма орасида тарқалмаган ва вилоят доирасидагина маълум бўлган. Сўнгги йилларда эса бу ҳудуд кўпчиликни ўзига жалб қилиб келмоқда.

Паданг қишлоғига ташриф буюрган сайёҳлар ушбу тепаликни эътибордан четда қолдирмасликка ҳаракат қилишади ва гидларнинг бу жой ҳақидаги ҳикоясини диққат билан тинглашади.

Бойсун гравитацион аномалиясидан ташқари, бу масканнинг бетакрор табиати - тоғ чўққилари ҳамда боғ-роғлари ҳеч кимни бефарқ қолдирмайди.

Таъкидлаш жоизки, бу каби ноёб ҳодисаларга Исроил (Бейт-Шемеш), Иордания (Иблис дараси), Ҳиндистон (Ладхак), Ўрта Урал (Невьян тумани) ва Жанубий Корея (Чежудо)да ҳам гувоҳ бўлиш мумкин.

Ўтган йили Kun.uz'да ҳам ушбу мавзуга оид фото- ҳамда видео-репортаж тақдим этилган эди.

Кўпроқ янгиликлар