Суперлигада илк истеъфо. Сергей Лушан лавозимини тарк этди

Спорт 22:15 / 07.04.2019 15324

Ўзбекистон Суперлигасининг 3-турида «Сурхон»га қарши Жиззахда кечган ва 0:3 ҳисобидаги мағлубият билан якунланган ўйиндан кейин «Сўғдиёна» бош мураббийи Сергей Лушан истеъфога чиқарилди.

«Бу ўйин учун жиззахлик барча мухлислардан узр сўрайман. Мағлубият учун жавобгарликни зиммамга оламан.

Ҳеч кимга ҳам эътирозим йўқ, нима бўлган бўлса ўйингача бўлган. Мен тактика танлашда ҳам, таркиб танлашда ҳам хато қилдим.

Яна бир бор барчадан узр сўрайман. Мен клуб раҳбариятининг ҳар қандай қарорини қабул қиламан. Кўришгунча», деган мураббий.

Tribuna.uz мухбири хабар беришича, клуб раҳбарияти бош мураббийни қониқарсиз натижалар туфайли истеъфога чиқаришга қарор қилган.

Жиззахликлар Суперлиганинг 1-турида «Бунёдкор»ни енгишганди (2:1), 2-турда эса жамоа «Насаф»га қарши сафар ўйинида мағлуб бўлди (1:3). «Сурхон»дан учралган мағлубиятдан кейин «Сўғдиёна» 3 очко билан турнир жадвалида 10-ўринда жойлашган.

2011-17 йилларда «Бунёдкор» клубида ишлаган Сергей Лушан 2018 йилнинг апрелида «Сўғдиёна» бошқарувига келганди. Жиззахликлар жамоаси раҳбарияти 2018 йилнинг декабрида ушбу мураббий штаби билан ҳамкорликни узайтирганди.

Кўпроқ янгиликлар