BusinessInsider 3700 дан ортиқ иш берувчилардан 30 та энг яхши бизнес мактабининг нуфузи ва битирувчиларининг ижодкорлигини баҳолашни сўради. Натижада  Гарвард энг яхшилар йигирматалигига ҳам кирмади.

Барча олий таълим муассасаларига олтита мезон бўйича 1 дан 5 гача бўлган баллар қўйилди. Масалан, бизнес мактабларининг юқори малакали ва ижодкор мутахассисларни ривожлантириш қобилияти ҳисобга олинди. Мутахассислар ҳар бир университет брендининг аҳамияти ва унинг бизнес ҳамжамиятидаги обрўсини ҳам баҳолашди. Хедхантерлар Печак лигаси (ингл. The Ivy League — АҚШнинг шимоли-шарқидаги етти штатда жойлашган саккизта хусусий мактаб уюшмаси. Бу ном университет деворларига чирмашиб ўсадиган печак новдаларидан келиб чиққан) университетлари бизнес мактабларини ҳайратда қоладиган даражада паст баҳолашди. Демак, Корнелль университети 12-ўринда,  Колумбия университети – 14-ўринда, Пенсильвания университети – 18-ўринда, Гарвардга эса бор-йўғи 21-ўрин, Дармут коллежига эса 30-ўрин насиб қилган.

Стэндфорд университети 1-ўрин, Жоржтаун университети – 2-ўрин, Йель университети эса 3-ўринни қўлга киритган.