Vodiy aholisi yana elektrdagi uzilishlardan norozi bo‘lmoqda. Bu holatga tabiiy gaz tanqisligi sababmi?

Jamiyat 00:08 / 22.02.2019 39756

Mana qish faslining oxirgi o‘n kunligidamiz. Bu yilgi sovuq oylar davomida vodiyning uch viloyatida aholi kundalik ehtiyoji uchun eng dolzarb bo‘lgan elektr ta'minotida ijobiy jihatlar sezilgan bo‘lsa, tabiiy gaz ta'minoti bo‘yicha bu fikrni ayta olmaymiz.

O‘tgan uch oy davomida joylardagi muammolar to‘g‘risida juda ko‘p maqolalar yozildi. Tarmoq mutasaddilari ko‘rsatilgan kamchiliklarni tez fursatlarda bartaraf qilgan paytlar ham bo‘lganini aytib o‘tish joiz.

Har ikki soha vakillari bu yilgi qishdan hech nolimasliklari kerak. Sababi, mavsum davomida qorli, qirovli, qahraton sovuq kunlar deyarli bo‘lmadi. Agar tabiat o‘z kuchini ko‘rsatganida doimgidek gazchilar va elektr xodimlarining yelka qisib turganiga guvoh bo‘larmidik...

Oxirgi hafta davomida havoning biroz sovishi har ikki tarmoqda yana muammolar keltirib chiqarmoqda. Uch viloyatdagi aholisi tomonidan murojaatlar soni ham ko‘paygan. Ularning ayrimlari bilan tanishamiz:

“Men, Namangan viloyati Kosonsoy tumani A. Jomiy mahallasidan Nurillo Ahmedovman. So‘ngi kunlarda elektr ta'minoti yomon holatda. O‘tgan oyda har kuni bir-ikki soat o‘chib turar edi. Havo darajasi pasaygach, o‘chirishlar ko‘payib ketmoqda.  Bugun, 21 fevral kuni Kosonsoy markazida tushgacha elektr bo‘lmadi. Mana hozir kech soat 21:00da ham tuman markazida tok o‘chirilgan. uzilishlar juda ko‘p bo‘lyapti”.

“Sizlarga O‘zbekiston tumanidan murojaat qilyapmiz. Oxirgi ikki hafta ichi elektr ta'minotida uzilishlar ko‘payib ketdi. Kunduzi o‘chgani kamdek, kechki payt ayni ovqatga o‘tirganimizda yana bir-ikki soat o‘chishi ortiqcha. So‘nggi 5-6 kun ichida, kechqurun ikki marta 1 soatdan o‘chishni odat qildi. Kunduzi ham 4-5 soat elektr berilmaydi”, deydi Farg‘ona viloyati, O‘zbekiston tumani, Qaynar qishlog‘ida yashovchi Shukurjon Islomov.   

Andijon viloyatining qator tumanlarida ham elektr ta'minoti aholiga pand bermoqda. Paxtaobod tumani Qoraqo‘rg‘on mahallasida kuniga 5-6 martadan tok o‘chayotgani haqida xabar berishdi. Aholi vakillari ayniqsa, elektr kechki payt ayni oila ovqatlanadigan, bolalar dars qiladigan paytda o‘chayotganidan norizo. Afsuski, zimiston mahalla aholisi dodini  tuman elektr korxonasi eshitmayapti.

Bu holatga faqat energetiklar javob berishi kerakmi? Gazchilar-chi?

Qishda ijtimoiy tarmoq va aholi o‘z xonadonlarini isitish masalasi birinchi o‘rinda dolzarb masala darajasiga chiqadi. Ma'lumki, isitish uchun tabiiy gaz, ko‘mir va boshqa yoqilg‘i resurslari zarur. Tabiiy gaz ta'minoti vodiy viloyatlarida doimiy muammolar girdobida. Bu holatni turli shahar va tumanlardan kelayotgan juda ko‘plab murojaatlardan ham bilib olish mumkin.  Aholi shuning uchun isitish uchun bor kuchni elektrga bermoqda.

Biz Andijon va Namangan hududiy elektr tarmoqlari bilan bog‘langanimizda Andijon mutasaddilari havoning biroz sovushi natijasida viloyatda energiya iste'moli 14 mln. kVt s.ga ko‘tarilib ketganini bildirishdi. O‘tgan yili xuddi shu kunlarda iste'mol 11 mln. kVt s.ni tashkil qilgan ekan. Namangan va Farg‘ona viloyatlarida ham xuddi shu holat. So‘nggi kunlarda iste'mol Namanganda 2 mln. kVt s.ga ko‘tarilib, 11,5 mln. kVt s ni tashkil etmoqda.     

Kommunal sohaning ikki tarmog‘i bo‘lgan gaz va elektr bir-birini to‘ldirib turishi zarur. Qish mavsumida isitish tizimida yuzaga kelayotgan muammolarda “O‘zstransgaz”ning uch viloyatdagi hududiy korxonalarining “ulushi” katta. Gaz yo‘q, ko‘mir va o‘tin qimmat bo‘lgach hamma elektrga “osiladi-da!”. Aholining katta qismi “gazsizlik”ka ko‘nikib ketgan bo‘lsa, hali tarmoqdan uzilmaganlarda muammolar juda ko‘p. Energetiklar tomonidan turli joylarda yangi liniyalar tortilayotgani, podstansiyalar, transformatorlar qo‘yilayotganidan xabarimiz bor, qo‘shni sohada esa yildan yilga muammolar ko‘payib bormoqda.  

Bu bilan mavjud kamchiliklarda elektrchilarning umuman aybi yo‘q deyishdan yiroqmiz. Ular juda ko‘p sonli xodimlar armiyasi va mavjud zamonaviy moddiy-texnika bazasi bilan qish mavsumining eng sovuq kunlariga tayyor turishlari zarur edi.

Sovuq faslning tugashiga ham oz qolgan. Bahor, yoz o‘tib, bir zumda yana kuz va qish fasli keladi. Har ikki tarmoq vakillari, ayniqsa “O‘ztransgaz”ning vodiydagi filiallari bu yilgi salbiy holatlardan xulosa chiqarsalar bo‘lar edi.

Andijon, Farg‘ona va Namangan viloyatlarida bugungi kunda yuz berayotgan elektr tanqisligi esa tez soatlarda bartaraf qilinishidan umidvormiz.     

O‘z muxbirimizdan

Ko‘proq yangiliklar: