Мадуро Трампнинг сиёсатини тушунтирди

Жаҳон 00:59 / 22.02.2019 15601

Венесуэла президенти Николас Мадуронинг фикрича, АҚШнинг Венесуэлага нисбатан ҳозирги сиёсати АҚШда 2020 йилда ўтадиган президент сайловлари билан боғланган. У бу ҳақда Hispan TV телеканалига берган интервьюсида айтиб ўтди.

Мадуронинг айтишича, АҚШ президенти Дональд Трампнинг рейтинглари уни кейинги сайловларда Демократик партия номзодлари осонликча енгиб ўтишларини кўрсатмоқда. Шу сабабли Трамп чорасиз қолган ва ўз позицияларини Венесуэла, Куба ва Никарагуага қарши ҳарбий ҳаракатлар ва баёнотлар билан яхшилай олиши мумкин, деб ҳисобламоқда. “Бу сайлов кампаниясини бошлаш учун энг жирканч усулдир”, деб айтган Мадуро.

Венесуэла президентининг таъкидлашича, Трампнинг Венесуэлани забт этиш истаги ушбу мамлакатнинг нефть, газ ва бошқа фойдали қазилмалари каби бойлиги билан боғланган.

Шу билан бирга Мадуро давлати Трамп баёнотларига қарши бирдам ва якдил эканини айтган. “Барча сўровномаларда венесуэлаликларнинг 90 фоиздан кўпроғи АҚШнинг ҳар қандай аралашуви, ҳарбий тажовузига қарши эканлиги айтилган”, деб таъкидлаб ўтган Мадуро. 

20 февралда Трампнинг миллий хавфсизлик бўйича маслаҳатчиси Жон Болтон Никарагуа президенти Даниэл Ортега ҳокимияти яқин орада поёнига етишини айтган. Унинг айтишича, АҚШда Ортеганинг “кунлари битган ва халқ яқин орада озод бўлади” деб ҳисобланмоқда. 

Кўпроқ янгиликлар