Божхоначиларга пенсия тайинлаш ва тўлаш тартиби тўғрисидаги низом тасдиқланади

Ўзбекистон 11:36 / 22.02.2019 9732

Норматив-ҳуқуқий ҳужжатлар лойиҳалари муҳокамаси порталида Вазирлар Маҳкамасининг “Давлат божхона хизмати органлари ходимларига пенсия ва нафақа тайинлаш ҳамда тўлаш тартиби тўғрисидаги низомни тасдиқлаш ҳақида”ги қарори лойиҳаси жойлаштирилди.

Низомга кўра, божхона органлари ходимлари ёки уларнинг оила аъзоларига пенсиянинг қуйидаги турлари тайинланади:

а) хизмат муддатини ўтаганлиги бўйича пенсия (уни олиш ҳуқуқи мавжуд бўлганда);
б) ногиронлик пенсияси;
г) боқувчисини йўқотганлик пенсияси.

Божхона органлари пенсионери вафот этганлиги муносабати билан дафн этиш маросими учун унинг оила аъзоларига бир марталик нафақа тайинланади. Божхона органлари ходимларига пенсия ва нафақа тўлаш Республика бюджети маблағлари ҳисобидан амалга оширилади.

Хизматдан бўшатилган ва пенсия олиш ҳуқуқига эга бўлган ходимга пенсия тайинлаш учун зарур бўлган ҳужжатлар божхона органларининг кадрлар тузилмалари томонидан қабул қилинади.

Пенсия тайинлаш учун қуйидаги ҳужжатлар тақдим этилади:

Пенсия олиш ҳуқуқини берадиган хизмат муддатини ўтаганлиги бўйича пенсия тайинлаш учун:

а) мувофиқ шаклда ариза;
б) фуқаролик паспорти, никоҳ тузилганлиги ёки бекор қилинганлиги тўғрисида гувоҳнома ва вояга етмаган фарзандларининг туғилганлик тўғрисидаги гувоҳномаларининг нусхалари;
в) хизмат йили ҳисоби;
г) пул таъминоти варақаси;
д) хизматдан бўшатилганлик тўғрисида буйруқдан кўчирма;
е) яшаш жойи бўйича Ўзбекистон Республикаси Молия вазирлиги ҳузуридаги бюджетдан ташқари Пенсия жамғармаси туман (шаҳар) бўлимлари томонидан давлат пенсиялари тайинланмаганлиги тўғрисидаги маълумотнома;

Ногиронлик пенсияси тайинлаш учун мазкур банднинг «а» кичик бандида назарда тутилган ҳужжатлар билан бирга касаллик тарихидан кўчирма ва Ўзбекистон Республикаси Соғлиқни сақлаш вазирлиги Тиббий-меҳнат экспертиза комиссияси (ТМЭК) томонидан ногиронликни белгилаш тўғрисидаги маълумотнома;
Боқувчисини йўқотганлик пенсияси тайинлаш учун:

а) мувофиқ шаклда ариза;
б) боқувчисининг вафот этганлиги тўғрисида ўлим гувоҳномаси нусхаси;
в) боқувчисини йўқотганлик пенсияси тайинланаётган шахснинг фуқаролик паспорти, никоҳ тузилганлиги ёки бекор қилинганлиги тўғрисидаги гувоҳнома ва вояга етмаган фарзандларининг туғилганлик тўғрисидаги гувоҳномаларининг нусхалари;
г) яшаш жойи бўйича Пенсия жамғармаси туман (шаҳар) бўлимлари томонидан давлат пенсиялари ёки нафақалари тайинланмаганлиги тўғрисидаги маълумотнома;
д) хизмат вазифаларини бажариш пайтида яраланиш, контузия олиш, майиб бўлиш ва касалланиш туфайли ўлим тўғрисида хулоса ва ходимнинг вафот этганлиги муносабати билан божхона органларидаги шахсий таркиб рўйхатидан чиқарилганлиги тўғрисида буйруқдан кўчирма (зарур бўлганда);
е) фарзандлари ногиронлигини тасдиқловчи ТМЭК маълумотномаси (зарур бўлганда);
ж) чин етимларга пенсия тайинланган ҳолатларда маҳаллий давлат ҳокимияти органларининг васийлик ёки ҳомийликни тайинлаш тўғрисидаги қарори нусхаси;
з) ТМЭК томонидан ногиронлик белгиланганлиги тўғрисида маълумотнома (турмуш ўртоғи, ота-онасига пенсия тайинланганда);
и) пул таъминоти варақаси.

Божхона органлари пенсионери вафот этганлиги муносабати билан дафн этиш маросими учун унинг оила аъзоларига нафақа тайинлаш учун қуйидаги ҳужжатлар тақдим этилади:

а) нафақа тайинлаш тўғрисида ариза (ихтиёрий шаклда);
б) мурожаат этган шахснинг фуқаролик паспорти нусхаси;
в) боқувчисининг вафот этганлиги тўғрисида ўлим гувоҳномаси нусхаси;
г) боқувчисининг вафот этганлиги тўғрисида ўлим ҳақидаги маълумотнама;
д) нафақа учун оила аъзоси мурожаат этмаган ҳолатларда фуқароларнинг ўзини ўзи бошқариш органи томонидан дафн маросимини ўтказган шахс тўғрисидаги маълумотнома.

Божхона органи кадрлар тузилмаси масъул ходими томонидан ходимнинг хизматни ўтаганлиги тўғрисидаги маълумотлар пенсия тайинлаш учун аризачи томонидан тақдим этилган ҳужжатлар асосида текширилади ҳамда календарь ва имтиёзли ҳисобга олинадиган даврлари, умумий хизмат йили ҳисоблаб чиқилади ва белгиланган тартибда тасдиқланади. Ҳисобланган хизмат йиллари божхона органининг молия-иқтисодиёт тузилмаси билан келишилади.

Ҳуқуқни муҳофаза қилувчи органлардан ёки махсус унвон ва мартаба даражаси бўлиши назарда тутилган бошқа органлардан хизматга ўтказилган ва ДБҚ Раиси томонидан махсус унвон берилган ходимларга хизмат йиллари учун фоизли устама ҳақ белгилашда уларнинг илгариги иш жойидаги (фоизли устама тўлаш учун белгиланган) хизмат ёки меҳнат стажлари инобатга олинади ҳамда ушбу давр ходим божхона органларидан бўшатилган тақдирда унга пенсия тайинлашда умумий хизмат стажига қўшиб ҳисобланади.

Кўпроқ янгиликлар