Чиқиндиларни жамоат жойларига ташлаб кетишга қарши курашувчи мобил илова пайдо бўлади

Ўзбекистон 16:40 / 20.02.2019 3887

Hashar Week ижтимоий лойиҳаси доирасида мобил илова ишлаб чиқилади. Келгусида ундан чиқиндиларни ноқонуний равишда жамоат жойларига ташлашга қарши кураш мақсадида ҳам фойдаланиш назарда тутилмоқда, деб хабар бермоқда Kun.uz мухбири.

Маълум қилинишича, 11-17 март кунлари Тошкент шаҳрида ўтказилиши режалаштирилган Hashar Week ижтимоий лойиҳаси доирасида Hashar Week иловаси орқали рўйхатдан ўтган фойдаланувчилар чиқиндиларни саралаб, 11та туманда ташкил этилиши назарда тутилган 22та пунктга сараланган чиқиндини топширса, қимматбаҳо совғаларга эга бўлади. 

«Лойиҳа кунлари тугагач, чиқиндиларни ноқонуний равишда жамоат жойларига ташлашга қарши курашдан иловадан фойдаланиш режалаштирилмоқда. Мазкур илова орқали фуқаролар ноқонуний чиқинди ташланган жой ҳақида маълумот бериши мумкин. Экология қўмитаси шу маълумотга асосан жойни бориб ўрганади, ҳудуддаги масъул шахслар билан муаммони бартараф этиш чораларини кўради. Илова эса март ойида ишга туширилиши режалаштирилган», – деб хабар берган Kun.uz мухбири Экология ва атроф-муҳитни муҳофаза қилиш давлат қўмитаси маълумотига таяниб.

Эслатиб ўтамиз, The K'orôbe London бошқарувчи директори, халқаро сиёсий маслаҳатчи Суна Парк ишлаб чиққан Hashar Week лойиҳаси ҳавонинг ифлосланиши, экология ва чиқинди билан боғлиқ муаммоларга кенг жамоатчилик эътиборини қаратишга йўналтирилган. Синов-тажриба тариқасида Тошкент шаҳрида ташкил этилаётган лойиҳа яхши натижа берса, у республикада ҳам амалиётга татбиқ этилади. Ташкилотчилар лойиҳани амалга ошириш орқали чиқиндиларни саралаш тизимини ривожлантириш ва оммалаштиришни мақсад қилиб қўйган.

Кўпроқ янгиликлар