Қашқадарё вилояти ИИБ раддияси: «Свет» йўқлиги туфайли паспорт учун сурат тушиб бўлмади

Ўзбекистон 18:34 / 19.02.2019 11728

16 февраль куни Қашқадарё вилоят ИИБ биносида электрэнергия таъминотидаги узилиш туфайли деярли 7 соат ичида фуқароларга тегишли хизмат кўрсатилмади. Бу ҳақда Қашқадарё вилоят ИИБ Матбуот хизмати Kun.uz'га маълум қилди.

Гап шундаки, Kun.uz ўқувчиси йўллаган мурожаат 16 февраль куни Қашқадарё вилоят миграция бошқармасида вақтини навбат кутиш билан йўқотган, кейин энергия йўқлиги туфайли хорижга чиқиш паспорти учун расмга тушолмагани ҳолати тасвирланган. 

Kun.uz сайтининг телеграмдаги каналида эълон қилинган Қашқадарё вилоят ИИБ МваФРБнинг иш фаолияти юзасидан билдирилган фуқаро мурожаатига нисбатан вилоят ички ишлар бошқармаси томонидан раддия билдирилди.

«2019 йил 17 февраль куни Kun.uz сайтида «Суратга тушиш учун бир кун сарфлаган фуқаро» сарлавҳаси билан Қашқадарё вилоятида яшовчи фуқаро томонидан Қашқадарё вилоят ИИБ МваФРБнинг иш фаолиятидан норозилиги баён қилинган.

Фуқаро ўз мурожаатида айрим ҳолатларни бўрттириб кўрсатган бўлиб, у томонидан билдирилган ҳолатларни Kun.uz'нинг ўқувчилари нотўғри тушунишлари олдини олиш мақсадида Қашқадарё вилоят ИИБ Матбуот хизмати қуйидаги мазмунда раддия билдиради.

2018 йил 16 февраль куни Қашқадарё вилоят ИИБ МваФРБ белгиланган тартибда ўз иш фаолиятини ташкил қилиб, шу куни фуқароларга навбат билан хизмат кўрсатиш тизими асносида хорижга чиқиш учун бериладиган паспорт олиш учун келган фуқароларни фотосуратга олиш билан боғлиқ жараённи ташкил этиши давомида маҳаллий вақт билан соат 13:50да «Қашқадарё ҳудудий электр тармоқлари» АЖ томонидан етказиб бериладиган электр таъминотида жиддий шикастланиш юзага келиши натижада МваФРБ электр таъминотсиз қолган. 

Мазкур  ҳолат бевосита 2019 йил 18 февраль куни «Қашқадарё ХЭТ» АЖ томонидан берилган №12/2092 рақамли хати билан тасдиқланади. Унда «16.02.2019 йил соат 13:50да Шимолий-35/6кВ подстанциясидан чиқувчи 6 кВли «Шаҳар-2» ҳаво электр узатиш тармоғи МТЗ ҳимоясидан аварияли ҳолатда ўчди. Электр тармоғидаги носозлик бартараф этилганидан сўнг электр тармоғига соат 18:24да кучланиш берилди», деб баён қилинган.

Шунингдек, фуқаро ўз мурожаатида интернет тармоғи орқали ижарага бериладиган движок қидирганини баён қилиб ўтган», ─ дейилади раддияда. 

Маълум қилинишича, вилоят МваФРБда движок мавжуд бўлиб, фуқароларни фотосуратга тушириш учун мўлжалланган ускуналарни ишлатиш учун ўзгарувчан хусусиятга эга бўлган доимий электр таъминоти кераклиги туфайли бундай ҳолатда ускуна движокка уланган тақдирда мазкур ускуна носоз ҳолатга келиши мумкин.

«Шу сабабли фуқаро ўз мурожаатида движок қўйиб берилишини сўраб билдирган важлари асоссиз бўлиб, давлат идоралари ҳар бир фуқарога намунали хизмат кўрсатишни, ҳар қандай ноқулай шароитни бартараф этган ҳолда қулайлик ва шароит яратиб беришни ўз мажбурияти деб билишини инобатга олиши лозим», ─ дейилади вилоят ИИБ раддиясида.

Раддияда фуқароларни фотосуратга тушириш учун мўлжалланган ускуналар нега кафолатланган, доимий электр таъминотига уланмагани ва мурожаатчи баён қилган тирбандлик бўйича изоҳ берилмаган.

Кўпроқ янгиликлар