Польша Ал-Қудсдаги тадбирда иштирок этишдан бош тортганидан кейин Исроилдаги саммит бекор қилинди

Жаҳон 20:50 / 18.02.2019 5518

Польша Ал-Қудсда бўлиб ўтадиган Вишеград гуруҳи мамлакатлари (Венгрия, Польша, Словакия, Чехия) етакчиларининг учрашувида иштирок этишдан воз кечди, Исроил ТИВ раҳбари Исроил Кацнинг польшаликлар антисемитизмига оид баёноти бунга сабаб бўлди. Шундан сўнг Исроил ҳукумат раҳбари иштирокидаги беш томонлама саммит қатор икки томонлама учрашувларга алмаштирилди. 

Саммитда иштирок этишдан воз кечишга оид қарор ҳақида Польша бош вазири Матеуш Моравецкий маълум қилди. 

“Исроилда режалаштирилган учрашувда Польша делегацияси қатнашмаслигига оид қарор қабул қилдим, Польша ташқи ишлар вазири Яцек Чапутович ҳам тадбирга бормайди, - дейди Моравецкий. – Кац (Исроил ташқи ишлар вазири)нинг сўзлари мутлақо мантиққа тўғри келмаслиги шундай қарор қабул қилишимга сабаб бўлди”. 

Унинг сўзларига кўра, Польшанинг Вишград гуруҳи бўйича шериклари Варшаванинг қароридан хабардор. “Улар бизнинг хатти-ҳаракатларимизни тўлиқ тушунишади”, - деди Моравецкий. 

Вишград гуруҳи сиёсатчиларининг учрашуви 19 февралда ўтказилиши режалаштирилган эди. Тўрт давлат бош вазирлари ва Исроил бош вазири Биньямин Нетаньяху иштирокидаги саммит Ал-Қудсда бўлиб ўтиши керак эди. 

Бироқ Варшава воз кечганидан сўнг Чехия бош вазири Арей Бабиш гуруҳ саммити бўлмаслигини маълум қилди. Унинг ўрнига Ал-Қудсда Чехия, Словакия ва Венгрия бош вазирлари иштирокида қатор икки томонлама учрашувлар ўтказилади. 

The Jerusalem Post газетаси Исроил бош вазирининг сўзларини нотўғри етказганидан сўнг Польша ва Исроил ўртасида дипломатик можаро юзага келди. Нетаньяху журналистларнинг Иккинчи жаҳон уруши вақтида польшаликларнинг нацистлар жиноятига алоқадорлиги тўғрисидаги саволга жавоб бераётган бўлган. 

Газета гўёки Нетаньяхунинг “холокостга бутун Польша халқи алоқадор” деган жавобини келтирган, бироқ кейинроқ унинг матбуот хизмати гап Польшанинг нацистлар билан ҳамкорлик қилган алоҳида фуқаролари ҳақида бораётганини айтиб, аниқлик киритган.

Кўпроқ янгиликлар