Ўзбекистонда аёллар онкологик касаллигининг олди олинади

Жамият 22:54 / 18.02.2019 9872

Ўзбекистонда аёлларда учрайдиган бачадон бўйни саратонининг олдини олишга йўналтирилган Одам папилломаси вирусига қарши вакцина жорий қилинмоқда. Соғлиқни сақлаш вазирлиги матбуот хизматининг хабар беришича, вазирликда Жаҳон соғлиқни сақлаш ташкилоти, ЮНИСЕФ ва ЮНФПАнинг Ўзбекистондаги ваколатхоналари вакиллари иштирокида ўтказилган тадбир давомида шу ҳақида маълум қилинган. 

Жаҳон соғлиқни сақлаш ташкилоти (ЖССТ) маълумотларига кўра, ҳар йили дунё миқёсида 370 мингдан зиёд аёлда бачадон бўйни саратони биринчи бор қайд этилади, шулардан 190 минг нафари ушбу касаллик оқибатида вафот этади. 

Бачадон бўйни саратони Ўзбекистонда энг кўп учрайдиган саратон касалликлари орасида иккинчи ўриндадир. Касалликлар орасида хавфлилик кўрсаткичи бўйича эса бачадон бўйни саратони барча ёшдаги аёллар ўртасида кўкрак бези ва ошқозон саратони хасталикларидан кейин учинчи ўринда ва туғиш ёшидаги аёллар орасида бачадон бўйни саратонидан ўлим кўрсаткичи иккинчи ўринда туради. 

Шундай қилиб, папиллома вируси касалликларининг салмоғи юқори бўлиб, унинг олдини олиш учун самарадорлиги юқори ва хавфсиз бўлган одам папилломаси вируси вакцинаси билан эмлаш орқали бачадон бўйни саратони билан касалланишнинг камайишига эришиш мумкин.

"2006 йилдан бошлаб қизлар дунё миқёсида ОПВга қарши вакцина билан эмланади, — деди ЖССТнинг Ўзбекистондаги ваколатхонаси масъул ходими Камола Сафаева. — Юздан ортиқ мамлакат ундан фойдаланиш учун рухсат олган, улардан 74 таси вакцинани ўзининг миллий эмлаш календарига киритган. Кўп йиллик ўрганишлар вакцинанинг самараси 10 йилдан ортиқ эканини кўрсатмоқда. Кўпчиликни вакцина қизларнинг репродуктив фаолиятига салбий таъсир кўрсатмайдими, деган савол қизиқтириши табиий. Жаҳонда ўтказилган тажрибалардан маълум бўлишича, ушбу вакцина қизларни нафақат бачадон бўйни саратонидан ҳимоялайди, балки уларнинг соғлиғини янада мустаҳкамлайди".

"Миллий эмлаш календари бўйича юртимизда болалар давлат ҳисобидан 12 та бошқариладиган инфекцияга қарши профилактик эмланади, уларни қўллаш эвазига кўп йиллардан буён қатор касалликларнинг олди олиняпти, — деди Соғлиқни сақлаш вазирлиги Санитария-эпидемиология назорати бош бошқармаси бошлиғи ўринбосари Дилором Турсунова. — ОПВга қарши вакцинанинг жорий қилиниши эса бачадон бўйни саратони касаллигининг олдини олишга хизмат қилади. Жойларда Глобал вакцина ва иммунизация альянси ёрдамида қурилаётган музлатгичли омборларда вакциналар сифатли сақланади ва тарқатилади. Вакциналар жорий йилнинг биринчи ярмида юртимизга олиб келина бошлайди ва октябрь ойидан бошлаб 400 минг нафарга яқин 9 ёшли қизлар мактабларда ва тиббиётнинг бирламчи бўғинларида эмланади".

Кўпроқ янгиликлар