Украина ҳарбий мақсадлар учун АҚШдан қарийб 700 млн доллар олади

Жаҳон 13:53 / 16.02.2019 5530

АҚШ президенти Дональд Трамп конгресс томонидан тасдиқланган, Киевга қарийб 700 млн доллар миқдорида ёрдам ажратиш тўғрисидаги қонун ҳужжатлари тўпламини имзолади, дея хабар беради Украинанинг АҚШдаги элчихонаси фейсбукда.

Ваколатхонанинг таъкидлашича, Қўшма Штатлар ҳукумати молиявий кўмак ҳажмини сезиларли даражада оширган.

Қайд этилишича, АҚШ Украинага 445,7 миллион доллар ажратади. Бироқ, Пентагон давлатни қўллаб-қувватлаш учун 250 миллион доллар йўналтирилгани ҳисобга олиниб, умумий қиймат 695,7 миллион долларни ташкил этади.

Аниқлик киритилишича, қўшимча маблағларнинг асосий қисми «Халқаро ҳарбий молиялаштириш» дастури бўйича Украинани ҳарбий-техник қўллаб-қувватлаш учун сарф-харажатларни 115 млн долларга оширишга йўналтирилади.

Эслатиб ўтамиз, аввалроқ Порошенко Россияга қарши 124 саҳифалик санкциялар тўплами қачон қабул қилинишини айтганди.

Кўпроқ янгиликлар