Тожикистон аҳолисига олтин қазиб олишга рухсат берилади

Жаҳон 13:12 / 16.02.2019 17496

Тожикистон ҳукумати жисмоний шахсларнинг олтин изловчилик фаолиятига рухсат беради, улар олтин ва бошқа қимматбаҳо металларни қазиб олиши мумкин бўлади. Бу ҳақда, ТАСС хабарига кўра, Тожикистон молия вазири Файзиддин Қаҳҳорзода 15 февраль куни хабар қилган.

«Қарор лойиҳаси яқин кунлар ичида ҳукуматга кўриб чиқиш учун тақдим этилади ва навбатдаги йиғилишда қабул қилинади», - дея амалдорнинг сўзларини келтирган Asia-Plus. Унинг сўзларига кўра, ҳозирги вақтда ҳужжат бошқа вазирликлар ҳамда идоралар томонидан кўриб чиқилмоқда.

Қарорга кўра, Молия вазирлигидан рухсат олган мамлакатнинг ҳар бир фуқароси қимматбаҳо металларни излаш ва қазиб олиш билан шуғулланиши мумкин бўлади. Уларни давлат молиявий тузилмаларига вазирлик томонидан белгиланадиган нархда топшириш мумкин.

Ҳозир Тожикистонда фақат рўйхатдан ўтган компаниялар қимматбаҳо металларни қазиб олиши мумкин. Олтин изловчилар аввалдан уларнинг штатига киритилади ва «иш берувчига» улар томонидан белгиланган нарх бўйича топилган нарсани топширишга мажбурлар.

Эслатиб ўтамиз, аввалроқ Ўзбекистон ҳукумати қимматбаҳо металларни олтин изловчилар усулида қазиб олишни расман қонунийлаштирганди.

Кўпроқ янгиликлар