Малайзия АҚШга Goldman Sachs банки бошқарувчисини экстрадиция қилади

Жаҳон 20:58 / 15.02.2019 2225

Малайзия суди Goldman Sachs банкининг собиқ бошқарувчиси Рожер Нгни АҚШга экстрадиция қилиш қарорини қабул қилди. Нг Малайзиянинг 1MDB суверен фондидан миллиардлаб доллар ўғирлаш мақсадида тил бириктиришда айбланган. 

Нг Goldman Sachs’нинг Жануби-Шарқий Осиёдаги раҳбари Тим Лейсснернинг ўринбосари бўлган. Лейсснер АҚШнинг пул ювишдаги айбловларини тан олган. Нг эса ўзини айбдор деб тан олмаяпти. 46 ёшли собиқ банкирнинг АҚШга топширилиши дунёдаги энг йирик инвестициявий банклардан бири атрофидаги халқаро можаронинг якуни бўлади.

1MDB’дан 4,5 млрд доллар олиб чиқилгани ҳақидаги хабар 2015 йилда пайдо бўлган. Ўшанда Малайзиянинг бош вазири Нажиб Раззоқ ҳисобрақамларида фонддан ўтказилган 681 млн доллар аниқланган. Ушбу иш билан 10 давлат ҳуқуқ-тартибот идоралари шуғулланган. Пул ювиш айблови бўйича банкнинг топ-менежерлари, Раззоқ ва унинг собиқ ўринбосари Аҳмад Зоҳид Ҳамидийга айбловлар қўйилган. Тергов маълумотларига кўра, фитна иштирокчилари фонднинг 3,5 млрд доллардан кўпроқ маблағини ўзлаштириб олишган. Улардан 1 млрд доллари АҚШ банк тизими орқали олиб чиқилган.  

Малайзия фонддан пулларнинг олиб чиқилишида Goldman Sachs муҳим роль ўйнаганини айтмоқда ва уни малайзиялик амалдорларни сотиб олишда айбламоқда. Шу сабабли банкдан 7,5 млрд доллар тўлашни талаб қилмоқда. Банк Малайзия ҳукумати айбловлари бўйича баҳслашмоқда.

1MDB билан боғлиқ можарога турли давлат ва соҳалар одамлари ва ташкилотлар аралашган. Мисол учун, “Уолл-стритлик бўри” фильмига продюсерлик қилган, Раззоқнинг асранди ўғли бошқарган Red Granite компанияси фонддан чиқарилган маблағларни олишда айбланган. Шунингдек, фонднинг йўқолган пулларидан суратлар сотиб олинган.

Кўпроқ янгиликлар