Amazon автомобиллар бўйича стартапга инвестиция киритмоқда. У Google ва Tesla’дан чиққанлар томонидан яратилган 

Технология 14:57 / 09.02.2019 3817

Google’нинг автомобиль бўлинмаси собиқ бошлиғи раҳбарлик қилаётган, ҳайдовчисиз технологиялар стартапи Aurora Innovation катта инвесторлар гуруҳи, шу жумладан, Amazon’дан ярим миллиард доллар (500 000 000 $) миқдорида молиялаштириш олади. Бу онлайн-савдо гиганти ўзини ўзи бошқарувчи транспорт дунёсида фаол ишлаётганлигининг аниқ белгисидир.

Ўтган ой охирида Embark ўзини ўзи бошқарувчи стартапи Amazon юкларини синов участкаларида олиб ўтаётгани маълум бўлганди. Бир ҳафта олдин, Amazon Scout номли автоматлаштирилган кичик робот етказиб берувчини ишлаб чиққани ҳақида эълон қилди.

«Бизнинг фикрча, йўллардаги муваффақиятли автономия хавфсизроқ йўллар яратади ва узоқ масофалардаги ҳайдовчилар учун иш шароитларини яхшилайди».

Amazon компанияси автомобиль саноатининг турли соҳаларида фаол ишламоқда. У Alexa’га эга ускуналар панелини чиқарди ҳамда овозли ёрдамчини бир нечта автомобилга интеграциялаштирди. Ўтган йили компания автомобиль юкхонасига қадар етказиб бериш хизмати ҳақида эълон қилди.

Amazon'нинг автоматлаштириш бўйича амбициялари янги эмас: компания кўп йиллар давомида учувчисиз дронлар устида ишламоқда ва, миш-мишларга кўра, уй роботини ишлаб чиқмоқда. Аммо Aurora’га сармоялар - бу компания ва автоматлаштирилган бошқарувга эга енгил автомобиллар ўртасидаги биринчи очиқ алоқа.

Ҳеч қайси компания Amazon 530 миллион доллардан қайси қисмни инвестиция қилгани ҳақида хабар бермади (Aurora жами 620 миллион долларни жалб этди).

Aurora 2016 йилда Крис Урмсон томонидан, у Google автомобиль дастуридаги ўз лавозимини тарк этганидан сўнг ташкил этилган. (У ушбу дастур Waymo деб ўзгартирилгандан бир неча ой олдин кетган). Урмсон Tesla’да Autopilot жамоасини бошқарган Стерлинг Андерсон ва Uber автоном бўлинмаси собиқ раҳбари Дрю Багнеллни ишга қабул қилди.

Ўшандан бери компания ўзини ўзи бошқарувчи автомобиллар учун дастурий таъминот устида ишлаб келган. Аслида, Aurora автоматлаштирилган транспорт учун бош тизимни яратмоқчи, кейин эса автомобиль ишлаб чиқарувчилар билан ҳамкорлик қилиб, уларнинг автомобилларига ўз ишланмаларини жорий этмоқчи. 2018 йилнинг бошида Aurora Volkswagen ва Hyundai биринчи харидорлари бўлишини эълон қилди, орадан бир неча ой ўтиб, Byton электрмобил стартапини рўйхатга қўшди.

Кўпроқ янгиликлар