GFR axborot texnikasi xavfsizligi bo‘yicha federal muassasasi (BSI) Huawei kompaniyasi Germaniya telekommunikatsiya tarmoqlari foydalanuvchilarining ma'lumotlarini Xitoy organlariga berilishi ehtimolini tekshiradi. Bu haqda GFR iqtisodiyot va energetika vaziri Peter Altmayyer ma'lum qildi.

"Buni faqat mutaxassislar tekshirishi mumkin", dedi vazir. "Buning uchun BSI jalb etildi", - ma'lum qildi u.

Shu bilan birga u GFR hukumatida Huawei qurilmalari Germaniya xavfsizligiga tahdid solishi mumkinligi to‘g‘risida ma'lumotlar yo‘qligini bildirdi.

"Xorijiy davlatlar ana shunday xavotir bildirdi", - dedi u.

Huawei AQSh va Avstraliya uni texnik josuslik va o‘z qurilmalari yordamida maxfiy ma'lumotlarni yig‘ishda ayblaganidan so‘ng iqtisodiy sanksiyalar xavfi ostida qoldi. Ushbu ayblovlar ortidan AQSh so‘roviga asosan Kanadada o‘tgan yilning 1 dekabrida Huawei moliyaviy direktori Men Vanchjou qo‘lga olindi. O‘z navbatida 11 yanvar kuni Polshada Huawei xodimi Xitoy foydasiga josuslik qilishda ayblanib hibsga olindi.