Британияда ташландиқ кўмир конларини сабзавот фермаларига айлантириш режалаштирилмоқда

Lifestyle 17:57 / 18.01.2019 2595

Британияликлар ташландиқ кўмир конларини сабзавот фермаларига айлантиришни режалаштиришмоқда. Қазиб олиш жараёнларидан кейин бўшаган конлар талофатли ўпирилишларга сабаб бўлиши мумкин, ҳудуд эса рекультивация ва катта миқдордаги сармояларни талаб этади. Бироқ олимлар бу муаммонинг оригинал ечимини таклиф этишмоқда: Британия бўйлаб жойлашган кўплаб ташландиқ конларни сабзавотлар ишлаб чиқарилувчи фермага айлантириш мумкин.

Ноттингем университети тадқиқотчиларининг фикрига кўра, эски кўмир конлари даромад келтириши ва жамият фойдаси учун хизмат қилиши мумкин. Улар мамлакатда “Чуқур ферма” номли лойиҳани амалга оширишни таклиф этишмоқда. Ушбу ферма ҳеч кимга керак бўлмаган конларда сабзавот ва кўкатларни ишлаб чиқишни ташкил этиш ва қишлоқ хўжалик ерларининг фойдали майдонларини банд қилмаслик имконини беради.

Қуёш нури йўқлигига қарамай, ер остидаги катта майдонга эга кон иссиқхона мажмуаси учун қулай жой саналади. Ер остида ташқи омиллар таъсирига мойил бўлмаган барқарор микроиқлим ташкил этилади.

Албатта ёруғликнинг йўқлиги сунъий ультрабинафша нурлари билан ёритиш тизимини яратишни талаб этади. Бироқ мутахассисларнинг ҳисоб-китобларига кўра, ўсимликларни ёруғлик билан таъминлаш харажатларини ер устида жойлашган иссиқхонани иситиш харажатлари билан таққослаб бўлмайди. Бундан ташқари, ерости сувларидан ҳам фойдаланиш мумкин.

Олимларнинг маълумотларига кўра, бир ферма 3 та хусусий уй каби энергия қувватини истеъмол қилади, бир йилда бу ерда кўкатлардан 10 мартагача ҳосил олиш мумкин.

Кўпроқ янгиликлар