Qozog‘iston prezidenti Nursulton Nazarboyev respublika huquqni muhofaza qilish organlari mamlakatning 47 nafar fuqarosini Suriyadan evakuatsiya qilganini ma'lum qildi.

"6 yanvar kuni huquqni muhofaza qilish organlari va tashqi ishlar vazirligi amalga oshirgan gumanitar operatsiya natijasida 47 nafar Qozog‘iston fuqarosi, jumladan 30 nafar bola Suriyadan evakuatsiya qilindi. Ular aldov yo‘li bilan inqiroz ichida qolgan mamlakatga olib ketilgan va terrorchilar qo‘lida garovda bo‘lgan", deyiladi Nazarboyevning matbuot xizmati tomonidan e'lon qilingan bayonotida.

Prezidentning qayd etishicha, mamlakatga qaytarilganlarga davlat tomonidan har tomonlama yordam ko‘rsatiladi.

Nazarboyev Qozog‘iston o‘z fuqarolarini ular qayerda bo‘lishlaridan qat'i nazar qo‘llab-quvvatlashini ta'kidladi. 

"Asosiy vazifamiz bu xavfsizlikni ta'minlash, mamlakat yaxlitligi va birligini himoya qilishdir. Biz o‘z ixtiyorisiz jangovar harakatlar hududlariga olib ketilgan bolalarni qaytarishni davom ettiramiz", deyiladi Qozog‘iston prezidentining bayonotida.