Ҳукумат қарори: Тошкент шаҳри марказида кўп тармоқли комплекс қурилади

Ўзбекистон 11:36 / 07.12.2018 14077

Вазирлар Маҳкамасининг “Тошкент шаҳрининг марказий қисмида кўп тармоқли комплекс қурилишини ташкил этиш чора-тадбирлари тўғрисида”ги қарори қабул қилинди.

Ҳужжат билан Тошкент шаҳар ҳокимлиги, Ўзбекистон Республикаси Инвестициялар бўйича давлат қўмитаси, Қурилиш вазирлиги ҳамда Туризмни ривожлантириш давлат қўмитасининг «Ta§kent Merkez Park Gayrimenkul Yatirim Anonim §irketi» компанияси (Туркия Республикаси) ва «UzTur Investment and Development» МЧЖ (Ўзбекистон Республикаси) томонидан Тошкент шаҳрида «Tashkent Central Park» кўп тармоқли комплекс қуриш лойиҳасини амалга ошириш тўғрисидаги таклифи маъқулланди.

Инвесторлар лойиҳани амалга ошириш доирасида 2019-2020 йилларда ўз маблағлари ва жалб қилинган маблағлар ҳисобидан лойиҳа ҳужжатларига мувофиқ беш юлдузли меҳмонхона, савдо-кўнгилочар марказ, тижорат банки учун маъмурий бинолар ҳамда бошқа иншоотлар қуриш мажбуриятини олганлар.

Ўзбекистон Республикаси Инвестициялар бўйича давлат қўмитаси:

хорижий инвесторлар билан хорижий инвесторлар ҳуқуқ ва мажбуриятлари, инвестициялар ҳажми, янги ташкил этиладиган иш ўринлари, тақдим этиладиган имтиёзлар ва преференциялар ҳамда бошқа шартларни қамраб олувчи инвестиция шартномаси бир ой муддатда, белгиланган тартибда тузилишини таъминлайди;

хорижий инвесторлар томонидан инвестиция шартномасидан келиб чиқувчи мажбуриятларнинг ижро қилиниши юзасидан назорат ўрнатади.

Тошкент шаҳар ҳокимлиги Ўзбекистон Республикаси Қурилиш вазирлиги, Ўзбекистон Республикаси Ер ресурслари, геодезия, картография ва давлат кадастр давлат қўмитаси билан биргаликда «UzTur Investment and Development» МЧЖга лойиҳани амалга ошириш учун Тошкент шаҳри, Юнусобод туманидаги Амир Темур шоҳ кўчаси, Шаҳрисабз ва Истиқлол кўчалари доирасидаги умумий майдони 2,5 гектар бўлган ер майдони доимий фойдаланиш ҳуқуқи асосида белгиланган тартибда ажратилишини таъминлайди.

Лойиҳани амалга ошириш доирасида инвесторлар, пудрат ва субпудрат ташкилотларига:

қурилишни «fast-track» услубида, фойдаланишга «тайёр ҳолда топшириш» шартларида амалга оширишга;

қурилиш учун олиб келинадиган импорт товарларни омборларда «божхона омбори» режимида жойлаштиришга рухсат берилди.

Лойиҳани амалга ошириш доирасида 2022 йил 1 январга қадар:

а) инвесторлар ва пудрат ташкилоти:

ягона ижтимоий тўловдан ташқари барча турдаги солиқлар ва давлат мақсадли жамғармаларига мажбурий тўловларни тўлашдан;

инвесторлар, пудрат ва субпудрат ташкилотларининг хорижий мутахассисларининг иш ҳақи фонди бўйича ягона ижтимоий тўловни тўлашдан;

белгиланган тартибда шакллантириладиган рўйхатлар бўйича олиб келинадиган материаллар, хомашё, ускуналар, технологик ҳужжатлар, бутловчи буюмлар ва эҳтиёт қисмлар, шунингдек, металл прокати учун божхона тўловлари тўлашдан (божхона расмийлаштируви йиғимларидан ташқари);

белгиланган тартибда тасдиқланадиган рўйхатлар бўйича «вақтинча олиб кириш» божхона режимида олиб келинадиган қурилиш техникаси, машина ва механизмлар, транспорт воситалари даврий божхона тўловлари тўлашдан;

б) инвесторлар, пудрат ва субпудрат ташкилотлари Ўзбекистон Республикаси норезидентлари томонидан бажариладиган ишлар (кўрсатиладиган хизматлар) бўйича қўшилган қиймат солиғини тўлашдан озод қилинди.

Белгиланишича:

инвесторлар ушбу қарорга мувофиқ имтиёзларни қўллаган ҳолда белгиланган тартибда шакллантирилган рўйхатлар бўйича импорт қилинадиган товарлардан мақсадли фойдаланилиши учун шахсан жавоб берадилар;

солиқ ва божхона имтиёзларини ноқонуний қўллаш ҳамда ушбу қарорга мувофиқ берилган имтиёзларни қўллаган ҳолда белгиланган тартибда шакллантириладиган ва тасдиқланадиган рўйхатлар бўйича импорт қилинадиган товарлардан мақсаддан ташқари фойдаланиш ҳолатлари аниқланган тақдирда солиқ ва божхона имтиёзларини қўллаш натижасида бўшайдиган маблағлар, қонун ҳужжатларида назарда тутилган жарима санкцияларини қўллаган, шу жумладан пеняларни ҳисоблаб ёзган ҳолда тўлиқ ҳажмда Ўзбекистон Республикаси Давлат бюджетига ундирилади.

Кўпроқ янгиликлар