«Йўл-йўлакай»: 95 ёшли онасини «Тахтиарава»да айлантираётган фарзанд

Жамият 16:20 / 30.11.2018 107200

Журналистнинг куни йўлда ўтади. Йўл эса доим турли ва турфа қизиқарли ҳодисотларга бой.

Kun.uz таҳририятига келиб тушган навбатдаги мурожаат юзасидан Андижондан Фарғона вилоятининг чекка туманига қараб йўл олдик. Марғилонга яқинлашганимизда тасвирчимиз кўча четидаги атлас соябонли аравага эътибор қаратди. Ортга қайрилиб, арава етаклаган опанинг олдига тушдик.

Youtube'да кўриш

Mover'да кўриш

Чиройли безатилган аравада иссиқ кўрпачаларга меҳр билан ўраб қўйилган нурли онахон ўтирарди. 

Саломлашамиз. «Онам 95 ёшдалар. Узоқ йиллар турли соҳаларда ишлаб, фарзандлар, неваралар, чевараларни улғайтирди. Уйда ўтириб, зерикиб қолади. Ҳар куни «Айлантириб келинглар», дейди. Онамизни сайр қилдириш учун мана шундай арава ясаттирдик. Ҳар куни ярим соатдан кўча айлантирамиз. Тоза ҳавода кўчаларни, одамларни кўриб дили ёзилади, кўнгли кўтарилади», дейди унинг 51 ёшли қизи Умидахон опа.  

Фарғона вилояти, Қўштепа туманида истиқомат қилувчи Отаназарова Муяссархон она 95 баҳорни қаршилаган бўлсада, ҳали жуда тетик. Қутлуғ ёшдаги она қишлоқ ва маҳалла ардоғида. Қўл очиб, фарзандларини дуо қилади.

Фарзандлар волидаси учун қуёш ва ёмғирдан пана қилувчи атлас соябон ва юмшоқ ўриндиқлар билан арава ясаттиришибди. Онанинг оддийгина, қўлбола «тахтиароба»да  хурсанд ўтирганини кўриб, юрак алланечук бўлди.

Таажжуб... Она қимматбаҳо автомобиль эмас, балки оддийгина аробада ўтириб кўча айланса ҳам бахтли эди. Волида учун уни дабдабали автомашина эмас, фарзандининг меҳр тўла қўллари етаклаган арава қувонч бахш этаркан.

Биз йўлимизда давом этдик. Одамийлик ва муҳаббатни етаклаб кетаётган арава ҳам катта йўлда ўзидан нур таратаётгандек кетиб борарди...

Элмурод Эрматов,
KUN.UZ мухбири.
Андижон - Фарғона

Кўпроқ янгиликлар