Трампнинг бойлиги қанча ва у қаердан даромад қилади?

Kun.uz light 18:10 / 27.11.2018 52179

У бир вақтлар 10 млрд доллар бойлиги борлигини эълон қилганди. Шунингдек, АҚШ президенти учун мўлжалланган йиллик 400 минг доллардан хайрия фойдасига воз кечиб, рамзий 1 доллар учун ишлайди. У тарихга АҚШнинг энг бой президенти сифатида кирган.

Бу таърифларнинг эгасини яхши биласиз – АҚШнинг амалдаги президенти, миллиардер Дональд Трамп.

Жуда кўпчилик Трампнинг муваффақият сирига қизиқади. Унинг ўзи муваффақият калити сифатида яхши оилада туғилиш ва вояга етишни кўрсатади. Лекин Дональд Трампнинг оламшумул шуҳрат қозониши, «дунёдаги биринчи рақамли амал» дея таърифланувчи АҚШ президентлигини эгаллашига сабаб ўзини муносиб даражада ва ортиғи билан кўрсата олганида. Дунёда минглаб миллиардерлар, маблағи Трампникидан ўнлаб баробар кўп бойваччалар бор.

Лекин Трамп битта!

Президентлик ўз йўлига, бойлик ўз йўлига эканлигининг яққол исботини Трамп бу амалда ўтказган илк йилидаёқ яхшигина англаб етди. Чунки бир йил ичида унинг пуллари 400 млн долларга камайди, Forbes рейтингида 10 ўрин пастлаб кетди, «бор йўғи» 3,1 млрд бойлиги қолди. Бунинг асосий сабаби шунда эдики, бир вақтлар барча ҳамкорлар унга бироз калондимоғлар бўлсада, узоқни кўра билувчи бизнесмен сифатида ёндашган бўлишса, энди унинг ёнига «АҚШ президенти» деган атама ҳам қўшилди. Сиёсат эса тусланишга мойил соҳа – бугун президент учун жонини беришга тайёр бўлганлар эртага уни ерга уриб ташлашдан ҳам тоймайдилар. Шундай экан, Трамп номи билан боғлиқ ҳар қандай лойиҳа катта таваккалчиликка айланиб қолади.

Мисол учун, АҚШнинг турли бурчакларида Трампга тегишли гольф клублар фаолият юритади. Трамп ғолибликни қўлга киритган штатларда ҳаммаси кўнгилдагидек – даромадлар барқарор ва қисман ўсган. Аммо Трамп мағлуб бўлган штатларда тескариси – даромадлар 4-5 фоизга пасайган.

Нью-Йорк марказидаги 5-авенюда жойлашган Trump Tower осмонўпар биноси ва Трампга тегишли бошқа иншоотлар баҳоси сўнгги йилларда анча пасайди. Биргина Trump Tower биносининг ўзи 41 млн долларга арзонлашган. Иккинчи бинодаги ижарачилар ҳам шартномани узайтиришга шошилмаяпти. Уларнинг энг машҳури ва катта даромад келтираётгани Nike компаниясининг 6000 кв.м.ли дўкони эди. Аммо Nike интернет савдоси ўсиб бораётгани ортидан анъанавий дўконларни қисқартириш режасига кўра ижара шартномасини узайтирмасликка қарор қилган.

Фото: Daily Express

Бундай омиллар таъсир қилиб, президентга тегишли The Trump Organization компанияси баҳоси бир йил ичида 50 млн долларга арзонлашиб кетди. Вазият шу даражага бориб етдики, бу компанияга тегишли қатор бинолар, меҳмонхоналар пештоқидаги бир вақтлар мижозларни жалб қилишга хизмат қилган Трамп номи ҳам суратлари олиб ташлана бошланди.

Шунга қарамай, президентга ҳамон яхшигина даромад келтираётган лойиҳалар талайгина. Трамп берган ҳисоботларга кўра улар: кўчмас мулк ижараси (1,337 млрд доллар), гольф клублар ва меҳмонхоналар ижараси (йилига 615 млн доллар), ўз номидан фойдаланиш, китоблардаги муаллифлик ҳуқуқлари (10 млн), узумзорлар (6 млн), қимматли қоғозлар (61 млн), самолётлар (58 млн), «Коинот гўзали» танлови (49 млн) кабилардир.

Гарчи бир вақтлар берган баёнотида 10 млрд долларга эга эканлиги ҳақиқатдан анча йироқлиги исботланган бўлсада, Дональд Трамп ўша камайиб қолган 3,1 млрд доллар билан ҳам АҚШ тарихидаги энг бой президент бўлиб қолаверади.

Аброр Зоҳидов

Кўпроқ янгиликлар