Toshkent shahrining Shayxontohur tumanidagi maktabgacha ta'lim muassasasi mansabdor va moddiy javobgar shaxslariga nisbatan jinoyat ishi qo‘zg‘atildi. Bu haqda Kun.uz’ga Bosh prokuratura matbuot xizmati xabar berdi.

Qayd etilishicha, Shayxontohur tuman 197-sonli maktabgacha ta'lim muassasasida sodir etilgan qonunbuzilish holatlari yuzasidan 2018 yil 20 sentabr kuni tuman prokuraturasi tomonidan tergovga qadar tekshiruv harakatlari o‘tkazilgan.

Tekshiruv natijasiga ko‘ra, 197-sonli maktabgacha ta'lim muassasasi mansabdor va moddiy javobgar shaxslariga nisbatan 22 sentabr kuni Jinoyat kodeksining 167-moddasi 2-qismi «a» bandi bilan jinoyat ishi qo‘zg‘atildi.

Bildirilishicha, jinoyat ishi bo‘yicha byudjyet va byudjyetdan tashqari mablag‘larning shakllanishi va maqsadli sarflanishi, tovar moddiy qimmatliklarning kirim-chiqim qilinishi va saqlanishini tekshirish maqsadida o‘tkazilgan taftish natijasida, muassasada 2016-2018 yillar davrida ish haqlari uchun mablag‘lar asossiz to‘langani va boshqa qonunbuzilish holatlari oqibatida juda katta miqdordagi mablag‘lar talon-taroj qilinganligi aniqlangan.

Ushbu holat yuzasidan Maktabgacha ta'lim vazirligining Ichki audit va moliyaviy nazorat xodimlari tomonidan 197-sonli maktabgacha ta'lim muassasasida tekshirish o‘tkazilgan bo‘lib, to‘plangan tekshirish hujjatlari jinoyat ishi materiallariga qo‘shilgan.