O‘zbekiston Milliy gvardiyasi qo‘mondoni Bahodir Toshmatov va Rossiya Federatsiyasi Milliy gvardiyasi qo‘shinlari federal xizmati direktori Viktor Zolotov idoralararo hamkorlik to‘g‘risida bitimni imzoladilar. Bu haqda RF Milliy gvardiyasi qo‘shinlari federal xizmati matbuot xizmati xabar berdi.

«Armiya generali Viktor Zolotov va O‘zbekiston Respublikasi Milliy gvardiyasi qo‘mondoni general-leytenant Bahodir Toshmatov Rossiya Federatsiyasi Milliy gvardiyasi qo‘shinlari federal xizmati hamda O‘zbekiston Respublikasi Milliy gvardiyasi bilan o‘rtasida hamkorlik to‘g‘risida bitimni imzoladilar», – deyiladi xabarda.

Imzolangan hujjatni almashish marosimi Rossiya va O‘zbekiston davlat rahbarlarining ishtirokida bo‘lib o‘tdi.

Idoralar o‘rtasidagi bitim jamoat tartibini saqlash va jamoat xavfsizligini ta'minlash, muhim davlat obektlarini qo‘riqlash, terrorizm bilan qarshi kurash sohasidagi hamkorlikni mustahkamlashga qaratilgan.

Imzolangan bitim bilan qo‘shma mashqlar va mashg‘ulotlarni o‘tkazish, favqulodda vaziyatlarda va terrorchilik tahdidlarida jamoat tartibini saqlashni ta'minlash bo‘yicha tadbirlar to‘g‘risida ma'lumot almashish, tajriba almashish, maslahatlashuvlar, seminarlar, konferensiyalar va o‘quv-uslubiy yig‘inlar, sport va madaniy aloqalarni rivojlantirish bo‘yicha tadbirlarni tashkil etish nazarda tutilgan.

Bitim moddiy-texnik ta'minot, ilmiy-tadqiqot faoliyati va axborot tizimlarini rivojlantirish ishlarini takomillashtirish bo‘yicha hamkorlikning asosiy yo‘nalishlarini belgilaydi.