IIV vaziri qashqadaryolik YPX xodimlariga “Captiva” avtomobillarini topshirdi

O‘zbekiston Respublikasi Prezidenti 2017 yil 11 iyul kuni “Yo‘l harakati xavfsizligini ta'minlash tizimini yanada takomillashtirish chora-tadbirlari to‘g‘risida”gi PQ-3127-sonli qarorni, O‘zbekiston Respublikasi Vazirlar Mahkamasi 2018 yil 9 mayda 377-sonli qaror bilan “2018-2022 yillarda O‘zbekiston Respublikasida yo‘l harakati xavfsizligini ta'minlash konsepsiyasi va uni 2018-2019 yillarda amalga oshirish yuzasidan “Yo‘l xaritasi” tasdiqlangan edi. Shu asosida Qashqadaryo viloyati hududidagi avtomobil yo‘llarida harakatlanish xavfsizligini ta'minlash, yo‘l-transport hodisalarining oldini olish, fuqarolarda yo‘l harakati qoidalariga rioya qilish madaniyatini oshirish yuzasidan profilaktik tadbirlarlarni kuchaytirish maqsadida O‘zbekiston Respublikasi IIV tomonidan YPX xodimlariga xizmatda foydalanish uchun zamonaviy rusumdagi patrul avtomobillari ajratilishi ko‘zda tutilgan edi.

Shuningdek, tahlillarga ko‘ra viloyat hududida sodir bo‘layotgan yo‘l-transport hodisalarini aksariyati haydovchilarni belgilangan tezlikni me'yoridan oshirib harakatlanishlari natijasida kelib chiqayotganligini inobatga olingan holda viloyat hokimligi  tomonidan avtomobil yo‘llarida nazorat olib borish uchun 4 dona zamonaviy tezlikni o‘lchash moslamalari olib kelinishi rejalashtirilgan edi.

2018 yil 29 sentabr kuni viloyat Ichki ishlar boshqarmasida O‘zbekiston Respublikasi IIV Po‘lat Bobojonov hamda Qashqadaryo viloyati hokimi Zafar Ro‘ziyevlar tomonidan Qashqadaryo viloyati IIV YHXB YPX xodimlariga 2 dona zamonaviy “Captiva” rusumli patrul avtomobillari hamda 1 dona “Avtokon” rusumli onlayn tarzda ishlovchi fotoradar moslamasi tantanali ravishda topshirildi. Bu haqda KUN.UZ’ga viloyat IIB Matbuot xizmati xabar bermoqda.

Taqdim qilingan zamonaviy  YPX patrul avtomobilllari va tezlikni o‘lchash moslamalaridan kelgusida viloyat hududidagi avtomobil yo‘llarida harakatlanish hamda fuqarolar xavfsizligini ta'minlash, haydovchilarni yo‘l harakati qoidalariga og‘ishmasdan rioya etishlarini nazorat qilish maqsadida foydalanish ko‘zda tutilgan.

“Avtokon” rusumli zamonaviy onlayn tarzda ishlovchi fotoradar moslamasida belgilangan tezlikni me'yoridan oshirib qoidabuzarlik qayd etilgach, qoidabuzarlik yuzasidan MJtKning tegishli moddasiga asosan belgilangan jarima to‘g‘risidagi qaror avtomatik tarzda transport vositasining egasining yashash manziliga yuboriladi.

Sarvar Anvar o‘g‘li,
KUN.UZ muxbiri