2018 yilning 19 sentabr kuni O‘zbekiston Respublikasi Tashqi ishlar vazirligida Yevropa parlamentining Tashqi ishlar bo‘yicha qo‘mitasi delegatsiyasi a'zolari bilan uchrashuv bo‘lib o‘tdi. Delegatsiya Toshkent shahriga O‘zbekiston – Yevropa Ittifoqi shaklidagi muntazam parlamentlararo muloqot doirasida kelgan.
TIV axborot xizmati xabariga ko‘ra, suhbat davomida siyosiy, savdo-iqtisodiy, investitsion, ilm-ta'lim, madaniy-gumanitar va boshqa sohalardagi ikki tomonlama aloqalar holati va rivojlantirish istiqbollari, O‘zbekiston va Yevropa Ittifoqi o‘rtasidagi ko‘p qirrali hamkorlikni qonunchilik sohasida qo‘llab-quvvatlash masalalari muhokama qilindi.
Uchrashuvda Kengaytirilgan sheriklik va hamkorlik to‘g‘risidagi bitim loyihasi bo‘yicha muzokaralar jarayoniga tayyorgarlik ko‘rishga alohida e'tibor qaratildi.
Shuningdek, ba'zi xalqaro va mintaqaviy muammolar yuzasidan ham fikr almashildi.