19:00 / 19.08.2018
10109
Сирожиддин Ҳасанов Ўзбекистон делегациясига илк медални олиб берди

Ўзбекистон эркин кураш жамоасининг 65 кг вазн тоифасидаги вакили Сирожиддин Ҳасанов бронза учун курашда мўғулистонлик Батмагнаи Батчулуунни мағлубиятга учратди.

Ўта мураккаб кечган баҳснинг биринчи раундида Мўғулистон вакили 5:2 ҳисобида ғолиб келганди. Иккинчи раунд эса Сирожиддин Ҳасановнинг тўла устунлигида кечди - 8:1. Натижада, Ўзбекистон вакили умумий ҳисобда 10:6 ҳисобида ғалаба қозониб, Ўзбекистон делегациясига 2018 йилги Осиё ўйинларидаги илк медални олиб берди.

«Kun.uz» мухбири Осиё ўйинлари бронза медали совриндоридан интервью олди.

«Осиё ўйинларидаги илк иштирокимдаёқ делегациямизга биринчи медални олиб келганимдан жуда ҳам хурсандман. Бу ҳали ҳаммаси эмас. Худо хоҳласа, бизда кумуш ва олтин медаллар ҳам бўлади.

2019 йили Туркиянинг Истанбул шаҳрида бўлиб ўтадиган жаҳон чемпионатида муваффақиятли иштирок этиб, Японияда бўладиган Ёзги олимпиадага йўлланма олишга ҳаракат қиламан.

Устозларимга, биринчи мураббийим Халимов Латиф акага, бош мураббийимиз Олим Ҳикматовга, шунингдек, Адҳамжон Очиловга, Абдували Бозорбоевга катта раҳмат айтаман. Мени қўллаб-қувватлаб турган ота-онамга ва барча ўзбекистонлик мухлисларга миннатдорчилик билдираман», деган спортчи.

Сирожиддин Ҳасанов турнирдаги иштирокини муваффақиятсиз бошлаган, нимчорак финалдаёқ ҳиндистонлик Базиранг Базирангга ютқазиб қўйганди. Лекин ҳиндистонлик спортчи финалга қадар етиб бориб, Ҳасановга бронза учун курашиш имкониятини тақдим этди ва Ўзбекистон вакили бу имкониятдан унумли фойдаланиб, саралашда Тожикистон вакили Абдулқосим Файзиевни 10:0 ҳисобида таслим этди.

Айни вақтда Ўзбекистон эркин кураш жамоасининг яна икки вакили курашни давом эттирмоқда. 

97 кг вазн тоифасида иштирок этаётган Магомед Ибрагимов ярим финалда имкониятни бой бергач, тўғридан-тўғри бронза медаль учун гиламга чиқадиган бўлганди. Унинг рақиби япониялик Такеши Ямагучи.

74 кг вазн тоифасида Ўзбекистон шарафини ҳимоя қилаётган Бекзод Абдураҳмонов эса финалга чиққан. У олтин медаль учун қозоғистонлик Данияр Каисановга қарши беллашади.

Мавзу
Осиё ўйинлари
18 августдан 2 сентябргача Индонезия пойтахти Жакарта шаҳрида XVIII Осиё Ўйинлари бўлиб ўтади. Турнирда қитъанинг 45 мамлакатидан 10 мингга яқин спортчи иштирок этади. Спортчилар Индонезияда 40 та спорт тури бўйича беллашади.
Барчаси
Top