Юмалоқ хатдаги важлар исботини топмади

Халқ овози 23:03 / 16.05.2018 20114

Шу кунларда KUN.UZ сайтига муаллифи кўрсатилмаган мурожаат (аноним – юмалоқ хат) келиб тушди. Қуйида мазкур мурожаат имло хатолари сақланган ҳолда тақдим этилмоқда. 

“Гапни кискасини айтганда СИЗларга илтимосим бор. Шу кунларда Тошкент шахар учтепа туманидаги 107 мактаб олдида янги бино - уй курилиши бошланган. Мактаб укувчилари укитувчилари канча сурашмасин, каршилик килишмасин фойдаси булмади, мактаб деворига туташ (шундок караганда мактаб худуди деса хам булади) майдонда бир неча йиллик дарахтлар бир кунда кесиб ташланди, тезда уй курилиши бошланди. Сизлардан ИЛТИМОСИМ, шу худудга чикиб журналистик суриштирув утказсангиз, уз кузингиз билан куриб килинаетган иш тугрими еки нотугрими, бахо бериб KUN.UZда ёзсангиз. Болаларимиз учун, мактаб учун фойдали нарса курилса
яхши булмасмиди? 1.Курилаетан уйда яшовчилар кандай яшайди билмадим, худуд кичкина, мактабга кушилиб кетган. 2. Мактабдаги болажонларимиз учун жуда нокулай жойда куриляпти. Айнан шу кунларда жуда окилона карорлар чикарилмокда (дарахтлар кесилишини тухтатилиши, биноларнинг нотугри курилишини тухталиши)”, - дейилади. 

Тўғрисини айтганда, биз мазкур мурожаатни умуман кўриб чиқмасликка тўла ҳақли эдик. Шунга қарамай, мурожаатчини ҳурмат қилган ҳолда унда кўрсатилган манзилга бориб ҳолат билан танишдик. 

Ҳақиқатдан ҳам қурилиш ишлари олиб борилаётгани тасдиқланди. Бироқ юмалоқ хатдаги таъкидланган жиҳатлар умуман ўз исботини топмади, десак хато қилмаймиз. Мурожаат муаллифи номаълум бўлгани сабабли, 5 қаватли турар-жой биносини қураётган “Тулпор” МЧЖ вакилларидан изоҳ олиш билан чекландик. 

Қайд этиш ўринлики, қурилиш майдони хавфсизлик меъёрларига тўла мос равишда ўраб чиқилган. Қолаверса, қурилишни олиб бориш учун барча ҳужжатлар тайёрланган. Ҳоким қарори билан ер майдони ажратилган. МЧЖ вакилининг сўзларига кўра, қурилиш ишлари бошлаганидан бери атрофдаги кишилардан давлат идораларига турли мурожаатлар бўлмоқда, бироқ аниқ бир фуқаро бирор даъво билан келмаган. 

Таъкидлаш ўринлики, бизлар ҳужжатлар билан тўла танишиб чиқдик. Бундан ташқари кўп қаватли бино тархида қурилиш ишлари якунланганидан сўнг, унинг атрофи тўла ободонлаштирилиши белгилангани, ён-теваракларидаги биноларга халақит қилмаслиги, ёнғин хавфсизлиги ва бошқа хавфсизлик меъёрларига мос келиши белгиланган бўлиб, давлатнинг масъул идоралари томонидан тасдиқланган.

Шунга кўра, айтиш мумкинки, мазкур кўп қаватли турар-жой биноси қурилиши билан боғлиқ ҳеч қандай қонунбузарликлар аниқланмади. 

Таҳририятдан: Ушбу юмалоқ хат ўрганилгани муаллифи кўрсатилмаган мурожаатларни бемалол йўллаш мумкинлигини англатмайди. Имзосиз мактублар ва мурожаатлар аксар ҳолларда рад этилади.