Исроил бош вазирига коррупцияда айблов қўйилмоқчи

Жаҳон 07:47 / 14.02.2018 4394

Jerusalem Post нашрининг Исроил телевидениесига иқтибос келтирган ҳолда маълум қилишича, полиция Исроил бош вазири Биньямин Нетаньяхуга иккита ҳолат бўйича коррупцияда айблов қўйишга асослар топди.

Полиция бу ҳақда Нетаньяху адвокатларини хабардор қилган. Бош вазирнинг ўзи айбловлар эълон қилинишига тайёргарлик кўрилаётганини тасдиқлаган, бироқ “Исроилни ҳалол ва масъулият билан бошқаришни давом эттиришини” айтган. У ўзининг тўлиқ айбсизлигини таъкидламоқда.   

Ҳуқуқ-тартибот идоралари бош вазирнинг хизматлар эвазига қимматбаҳо совғалар олганини тергов қилмоқда. Жумладан, тергов Нетаньяхуни АҚШга узоқ муддатли визани олмоқчи бўлган продюсер Арнон Мильчиндан сигара, шампан виноси ва ҳашамат буюмлари олганликда гумон қилмоқда.

Бош вазирнинг ўзи эса ҳеч қандай қонунбузарлик содир этмаганлигини, дўстлардан совғалар олиш эса тақиқланмаганини айтмоқда. Нетаньяху ушбу иш бўйича бир неча маротаба сўроқ қилинган.