Шимолий Корея етакчиси Жануб билан ярашув муҳитини янада жонлантириш муҳимлигини айтди

Жаҳон 07:31 / 13.02.2018 5373

Шимолий Корея етакчиси Ким Чен Ин Жанубий Кореядан қайтган делегация вакиллари билан учрашди. Бу ҳақда Корея марказий телеграф агентлиги маълум қилди.

Учрашувда Шимолий Кореянинг расмий раҳбари Ким Ён Нам ва Ким Чен Иннинг синглиси Ким Ё Чжон иштирок этган, улар давлат етакчисига сафар ҳақида батафсил ҳисобот тақдим қилишган.

“Ким Чен Ин ҳисоботни қабул қилгандан кейин мамнуният билдирди ва Жанубий Корея томондан Шимолий Корея делегацияси қабул қилинган шароитлар яхши тассурот қолдирганини айтди”, деб айтилган хабарда.

Шимолий Корея етакчиси Шимол ва Жануб ўртасида “ярашувнинг илиқ муҳитини янада жонлантириш ва мулоқотни давом эттириш” муҳимлигини айтган.

22 кишидан иборат Шимолий Корея делегацияси Жанубий Кореяга 9 февралда махсус рейс билан етиб келганди. Делегация вакиллари Олимпиада очилиш маросимида иштирок этишган ҳамда Жанубий Корея президенти Мун Чжэ Ин ва бош вазир Ли Нак Ён билан учрашишган.