Қозоғистонда ўқитувчилар асосий маошдан 30-50 фоизини қўшимча устама ҳақ сифатида оладилар

Жаҳон 16:29 / 13.02.2018 7221

Қозоғистон ўқитувчилари асосий иш ҳақига қўшимча тарзда устама ҳам оладилар. Тегишли қарорни Қозоғистон Республикаси бош вазири Бакитжан Сагинтаев имзолади.

2018 йил 1 январдан кучга кирган ҳужжатга мувофиқ, таълимнинг янгиланган мазмунига қараб, бошланғич, ўрта ва умумий ўрта таълим дастурларини амалга оширадиган таълим муассасалари ўқитувчиларининг қўшимча устама ҳақи 30 фоизни ташкил этади.

Кўрсатилган қўшимча тўловни белгилаш тартиби ва шартлари таълим соҳасидаги ваколатли орган томонидан белгиланади. Ушбу қўшимча устама амалдаги иш юкламасини ҳисобга олган ҳолда расмий маошга белгиланади, лекин қонун ҳужжатларида белгиланган меъёрий таълим юкламасидан ошмайди.

Бундан ташқари, миллий малака имтиҳонини топширган ва бошланғич, асосий ҳамда умумий ўрта таълимга мўлжалланган таълим дастурларини амалга оширувчи ўқитувчилар: уста-педагог, педагог-тадқиқотчи, ўқитувчи-эксперт, ўқитувчи-модератор педагогик маҳорат малакаси учун 30 дан 50 фоизгача бўлган қўшимча устама ҳақ олади.