Elektr energiyasi va tabiiy gaz nazorati va hisobining avtomatlashtirilgan tizimi joriy etiladi

O‘zbekiston 22:05 / 13.11.2017 39518

O‘zbekiston Respublikasi Prezidentining «Elektr energiyasi va tabiiy gaz nazorati va hisobining avtomatlashtirilgan tizimini jadal joriy etish chora-tadbirlari to‘g‘risida» qarori Prezident rasmiy saytida e'lon qilindi.

Qaror matnidan ma'lum bo‘lishicha, elektr energiyasi va tabiiy gaz nazorati va hisobining avtomatlashtirilgan tizimini yanada joriy etish yuzasidan takliflar tayyorlash bo‘yicha Ishchi komissiya tomonidan «Sagemcom» (Fransiya), «Elster GmbH» (GFR), «Landis & Gyr» (Shveytsariya) kompaniyalari va «Toshelectroapparat» MChJ XK (O‘zbekiston) bilan O‘zbekiston Respublikasida elektr energiyasi va tabiiy gaz nazorati va hisobining avtomatlashtirilgan tizimini joriy etish loyihasini (keyingi o‘rinlarda Loyiha) amalga oshirish yuzasidan to‘g‘ridan-to‘g‘ri muzokaralar o‘tkazilgan.

Ishchi komissiyaning Loyiha doirasida dastlab 2 million dona elektr energiyasi va tabiiy gazni hisobga olish uskunalari, shuningdek, dasturiy ta'minot, qo‘shimcha asbob-uskuna, boshqa zarur texnik vositalarini «Sagemcom», «Elster GmbH» kompaniyalari va «Toshelectroapparat» MChJ XKdan istisno tariqasida tender savdolarini o‘tkazmasdan xarid qilish to‘g‘risidagi taklifiga rozilik berilgan.

Ishchi komissiyasining qaroriga asosan «O‘zbekenergo» AJ va «O‘ztransgaz» AJ Loyiha doirasida hisobga olish uskunalari va qo‘shimcha vositalarni ularni respublikada ishlab chiqarish yo‘lga qo‘yilgunga qadar ushbu bandda ko‘rsatilgan ishlab chiqaruvchilardan qo‘shimcha xarid qilishi mumkin.

Ishchi komissiya «O‘zbekenergo» AJ va «O‘ztransgaz» AJ bilan birgalikda bir oy muddatda Loyiha bo‘yicha «Sagemcom», «Elster GmbH» kompaniyalari va «Toshelectroapparat» MChJ XK bilan yakuniy muzokaralar o‘tkazilishi va kontraktlar tuzilishini tashkil etadi.

«O‘zstandart» agentligi muzokaralar yakuniga qadar Loyiha doirasida o‘rnatiladigan hisobga olish uskunalarining turlariga nisbatan texnik talablarni tasdiqlaydi.

Qarorda belgilanishicha:

- 2020 yil 1 yanvardan Loyihaning amalga oshirish muddatiga 1 kVt/soat elektr energiyasi uchun 15 so‘m, 1 m. kub tabiiy gaz uchun 17 so‘m (respublikada realizatsiya qilinadigan) miqdorida zaruratga ko‘ra indeksatsiya qilinadigan hamda faqatgina Loyiha doirasida Tiklanish va taraqqiyot jamg‘armasining jalb etilgan mablag‘larini qoplashga hamda boshqa xarajatlarni moliyalashtirishga yo‘naltiriladigan investitsiyaviy ustama joriy etiladi;

- Loyiha doirasida hisobga olish uskunalarini o‘rnatishda keyinchalik ularni davlat ko‘rigidan o‘tkazgan holda sertifikatsiya ishlarini olib borish belgilangan tartibda «O‘zstandart» agentligi tomonidan amalga oshiriladi;

- hisobga olish uskunalarini o‘rnatishda plombalash «O‘zbekenergo» AJ, «O‘ztransgaz» AJ va O‘zbekiston Respublikasi Bosh prokuraturasi huzuridagi Majburiy ijro byurosi (MIB) ning vakolatli xodimlari tomonidan amalga oshiriladi;

- Loyiha doirasida o‘rnatiladigan hisobga olish uskunalarining davlat ko‘rigi «O‘zstandart» agentligi tomonidan har 10 yilda amalga oshiriladi. Bunda hisobga olish uskunalarini davlat ko‘rigiga topshirish bo‘yicha ishlarni tashkil etish «O‘zbekenergo» AJ, «O‘ztransgaz» AJ va Byuro tomonidan ta'minlanadi;

- iste'molchidan davlat ko‘rigidan, xizmat ko‘rsatish va boshqa ishlarni o‘tkazish uchun yechib olingan hisobga olish uskunasining o‘rniga zudlik bilan «O‘zbekenergo» AJ va «O‘ztransgaz» AJ mablag‘lari hisobidan boshqa ko‘rikdan o‘tgan hisobga olish uskunasi o‘rnatiladi.

Respublika hududiga Loyihaning texnik parametrlariga mos kelmaydigan hisobga olish uskunalari va qo‘shimcha vositalarni olib kirish taqiqlanadi.

Ko‘proq yangiliklar: