Rossiyaga import qilinadigan yengil sanoat mahsulotlarining 54 foizga yaqini “Yengil sanoat mahsuloti xavfsizligi to‘g‘risida”gi talablarga javob bermaydi. Bu haqda Rospotrebnadzor matbuot xizmati 2017 yil 9 oylik tekshiruvlar natijalariga doir yig‘ilishida ma'lum qildi. 

“Texnik talablarga mos kelmaydigan mahsulotlarning 54 foizi importga to‘g‘ri keladi. Shunga binoan Rossiyaga boshqa davlatlardan olib kirilayotgan mahsulotlarga jiddiy e'tibor berish kerak”, - deyiladi xabarda.

Umuman, tashkilot tekshiruvlari natijasida yengil sanoat mahsulotlaridan 720 tonnasi savdo peshtaxtalaridan qaytarib olingan. Bunda sifatsiz mahsulotlarning 40 foizi mo‘ynali mahsulotlarga to‘g‘ri keladi. Qolgan qoidabuzarliklar ayollar liboslari, poyabzal, ichkiyim va tekstil mahsulotlaridir. 

Qoidabuzarliklarning aksariyati savdo belgilarini noto‘g‘ri qo‘yish bilan bog‘liq. “5 foiz mahsulot kimyoviy va biologik xavfsizlik ko‘rsatkichlariga muvofiq emasligi aniqlandi", - deya qo‘shimcha qilinadi Rospotrebnadzor xabarida.