Latviyaning Dartz kompaniyasi tomonidan ishlab chiqilgan «Qora timsoh» — Jyeyms Bond haqidagi yangi kinokartinada paydo bo‘ladi. Bu haqda firma asoschisi va rahbari Leonard Yankelovich CarBuzz portaliga ma'lum qildi va Facebook sahifasida xabar qoldirdi. Shu bilan birga, u yangi suratlarni ham joylashtirdi. 

Yankelovichning so‘zlariga ko‘ra, bu avtomobil josus Bond haqidagi 25-filmning yovuz qahramonining mashinasi bo‘ladi. E'tiborli jihati, bu Dartz firmasiga bildirilgan birinchi ishonch emas. Uning yo‘ltanlamasi Pirs Brosnan bosh qahramon bo‘lgan «Noyabr odami» filmida va Sasha Baron Koenning «Diktator» kartinasida qatnashgan. 

Dartz kompaniyasining yangi modeli Mercedes-AMG GLS 63 negizida barpo etiladi. Unga 5.5 l, ikki turbinali V8 motor qo‘yiladi. Uning kuchi 585 ot kuchiga teng, ammo xaridorlarga 760, 850, 1100 va 1600 ot kuchiga ega.

«Qora timsoh» kuzovi kevlar va ugleplastikdan yasaladi, qo‘shimcha haq evaziga titan va kevlardan yasalgan zirxli namunasini buyurtma qilish mumkin. 

Yo‘ltanlamasning yana bir o‘ziga xosligi uning saloni timsoh va skat charmi bilan jilolanadi. Bundan tashqari, oltin va platina bilan ishlov berilgan tugmali rulga ega bo‘ladi. Shuningdek, 292 dona olmos va 2ta rubinli firma timsoli ham joylanadi. 

Avtomobil 2017 yil iyulida Gumball 3000 poygasi doirasida namoyish etilgan. O‘shanda, Yankelovich bu prototip ekani, sotiladigan model emasligini aytgandi. Nima bo‘lgandayam, suratlarda uning farqi ko‘zga tashlanmaydi.