O‘zbekiston hukumati bugungi kunda mamlakatda tadbirkorlar uchun mavjud soliqlar sonini qisqartirish ustida ish olib bormoqda. Xalqaro Press-klubda bo‘lib o‘tgan «O‘zbekistonning zamonaviy soliq siyosati: vazifalar va amalga oshirish mexanizmi» mavzusidagi navbatdagi sessiyada shu haqda ma'lum qilindi. O‘zbekiston iqtisodiyot vaziri o‘rinbosari Shuhrat Ismoilov bu masalaga quyidagicha oydinlik kiritdi. 

«Bugungi kunda bizda tadbirkorlik qilish, sarmoyalar jalb etish uchun qator imtiyozlar bor. Ammo ishlab chiqarish sohasida faoliyat yurituvchi tadbirkorlik sub'yektlari soliq to‘lash borasida ma'lum bir muammolarga duch kelmoqda. O‘zbekiston Jahon bankining Doing Business reytingi soliq to‘lash bandida juda quyi, ya'ni 141-o‘rinda. Buning sabablaridan biri 46 turdagi soliq to‘lovlari mavjudligidadir.

Rivojlangan mamlakatlarda yiliga 4-5 turdagi soliqlar mavjud. Bu yo‘nalish soliq miqdorlarini kamaytirish bo‘yicha ishlab chiqayotgan hujjatlarda qayd etiladi. Oddiy tadbirkor uchun soliq to‘lash mexanizmini ham soddalashtirishimiz kerak», – deb qayd etdi Ismoilov. 

Yaqinda davlat rahbari tomonidan qabul qilingan soliq tizimini isloh qilishga doir farmonida qayd etilganidek, 2018 yil 1 yanvaridan O‘zbekistonda soliq ta'tillarini joriy etish ko‘zda tutilgan. Bu amaliyot, asosan, xolis va pok soliq to‘lovchilar mushkul iqtisodiy holatga tushib qolganda ularga qonunchilikda belgilangan tartibda yengillik taqdim etish maqsadida qo‘llaniladi.