Xitoyning Alibaba giganti 20 yildan keyin kattaligi bo‘yicha dunyoning beshinchi iqtisodiyotiga aylanishi mumkin. Kompaniya raisi Jyek Ma shunday bayonot bilan chiqdi. Daily Sabah shu haqida xabar berdi. 

"Agar kompaniya ikki milliard iste'molchiga xizmat ko‘rsata olsa, bu dunyo aholisining uchdan bir qismini tashkil qiladi. Agar kompaniya 100 million ishchi o‘rnini yarata olsa, bu aksariyat mamlakatlar hukumatlari yaratadigan ishchi o‘rinlardan-da ko‘p hisoblanadi. Agar kompaniya o‘z platformalarida 10 million daromadli korxonalarni qo‘llab-quvvatlay olsa, bu iqtisodiyot deb ataladi", - dedi Jyek Ma kompaniya investorlari bilan kechgan uchrashuvda. 

Maning so‘zlariga ko‘ra, Alibaba 2020 yilga borib Avstriya, Eron, Norvegiya, Polsha va Shvetsiya kabi qator mamlakatlaridan o‘tib, 1 trillion AQSh dollari ko‘rsatkichiga erishish va 2036 yilda 2 milliard mijozga xizmat ko‘rsatishni maqsad qilgan. 

Jyek Ma 2036 yilga borib Alibaba 100 millionga yaqin ishchi o‘rinlarini yaratishini va AQSh, Xitoy, Yevroittifoq hamda  Yaponiyadan keyin dunyoning eng kuchli beshinchi iqtisodiyoti bo‘lishini prognoz qildi.