Ma'lumki, 12 maydan dunyoning ko‘plab davlatlarida kompyuterlarning “WannaCry” va uning takomillashtirilgan ko‘rinishidagi tamagir viruslar bilan zararlanish holatlari kuzatildi. Virusning ishlash mohiyati shundan iboratki, u Windows dasturiy ta'minotining yangilanishlaridan kompyuter tizimiga kirib oladi va undagi barcha fayllar hamda ma'lumotlarni bloklaydi. Mazkur bloklashni bekor qilish uchun esa, xakerlar guruhi qisqa muddat ichida 300 bitkoin miqdorida tovon puli to‘lashni talab qilishadi. 

2017 yil 17 may kuni Xalqaro Press-klubning navbatdagi sessiyasida shu kabi tamagir viruslarning O‘zbekistondagi kompyuterlarga naqadar salbiy ta'sir etgani yoki davlat idoralari kompyuterlarining necha foizi virus bilan zararlangani yoxud yo‘qligiga oydinlik kiritildi.  

Oshkoralik tamoyilida bo‘lib o‘tgan uchrashuvda ishtirok etgan O‘zbekiston Axborot texnologiyalari va kommunikatsiyalarini rivojlantirish vaziri Sherzod Shermatovning so‘zlariga ko‘ra, qanchalik afsuslanarli bo‘lmasin, O‘zbekistondagi aksar kompyuterlarda Windows dasturiy ta'minotlarining noqonuniy nusxalaridan foydalanilishi va ularning internet orqali yangilanib turilmasligi g‘arazli virus tarqalishining oldini olgan.