Video: Daniyada futbol muxlislari maydonga o‘lik kalamushlarni uloqtirishdi

Daniyaning "Brondbyu" klubi muxlislari mamlakat chempionatining navbatdagi turida "Kopenhagen"ga qarshi uchrashuvda kurakda turmaydigan ishni amalga oshirishdi. Muxlislar mehmon jamoa futbochilariga qarata o‘lik kalamushlarni uloqtirishgan. Ushbu holat tasvirlangan video internetda paydo bo‘ldi.

Voqea uchrashuv yakunlanishiga 5 daqiqa qolganda yuz bergan: "Kopenhagen" o‘yinchisi Benyamin Verbich burchak to‘pini amalga oshirgani borganda, raqib jamoa muxlislari unga va yaqin atrofdagi jamoadoshlariga o‘lik kalamushlarni otishni boshlashgan. Hammasi bo‘lib maydonga 4 ta kalamush otilgan. Futbolchi dastlab bunday muomaladan bir oz o‘zini yo‘qotib qo‘ygan, biroq keyin jamoadoshi bilan maydonni "kutilmagan mehmonlardan" tozalashni boshlagan.

Ta'kidlash joizki, uchrashuv "Kopenhagen"ning 0:1 hisobidagi g‘alabasi bilan yakunlangan. Uchrashuvdagi yagona to‘pni aynan "jabrdiyda" Verbich amalga oshirgan.

Shu g‘alabadan keyin chempionat peshqadami "Kopenhagen" 2-o‘rinda borayotgan "Brondbyu"dan 13 ochko oldinlab ketdi.

Bu ikki jamoa Daniyaning o‘zaro eng murosasiz jamoalari va nomdor klublaridan hisoblanadi. "Kopenhagen" chempionatni 11 marotaba, "Brondbyu" esa 10 marotaba yutgan.