Buyuk Britaniyaning lyuks avtomobillar ishlab chiqaruvchi Rolls-Royce kompaniyasi korrupsiya mojarosiga barham berish uchun AQSh, Buyuk Britaniya va Braziliya hukumatlariga jarima to‘laydi. Umumiy hisobda 671 mln funt sterling (817,2 mln dollar) to‘lanadi, deb yozadi Financial Times nashri.

Aniqlik kiritilishicha, Rolls-Royce kompaniyasi Qo‘shma Shtatlar adliya vazirligiga 169,2 mln dollar, Braziliya federal prokuraturasiga 25,6 mln, Buyuk Britaniya yirik firibgarlikka qarshi kurash xizmati (Serious Fraud Office, SFO)ga 497,3 mln funt (605,7 mln dollar) jarima to‘laydi.

Tomonlar ushbu kelishuvga oydinlik kirituvchi bitimni imzolashgan. 

Britaniya korrupsiyaga qarshi xizmati (SFO) 2012 yilda Rolls-Royce kompaniyasiga nisbatan tergov ishlarini boshlagan edi. Firma Xitoy va Indoneziyada korrupsiya aralashgan kelishuvlarni tuzganlikda ayblangan edi. AQSh adliya vazirligi esa, 2014 yilda avtomobil ishlab chiqaruvchisiga nisbatan ish ochdi. O‘sha yili kompaniya Braziliyada ham korrupsiyada ayblana boshlandi.