Tramp unga hajviy taqlid qilgan aktyordan ranjidi

AQSh prezidenti etib saylangan Donald Tramp unga hajviy taqlid qilgan taniqli aktyor Alek Bolduindan ranjidi. Aktyor NBC telekanalidagi Saturday Night Live hajviy ko‘rsatuvida siyosatchiga taqlid qilgan. Trampning aytishicha, taqlid kulgili chiqmagan va noxolis bo‘lgan.
      
"Saturday Night Live’ni tomosha qilishga harakat qildim – umuman ko‘rib bo‘lmaydi! Mutlaq noxolis, kulgili emas va Bolduinning taqlididan battari bo‘masa kerak. Afsus", deb yozgan Tramp tvitterda.

Aktyor bunga javoban, agar Tramp o‘zining daromadlari bo‘yicha soliq deklaratsiyasini chop etsa, buni bas qilishini aytgan. Tramp bir necha o‘nlab yillar davomida hali o‘zining daromadlarini chop etmagan birinchi prezident bo‘ldi. 

"Soliq deklaratsiyangizni chop eting va buni bas qilaman. Xa!", deb yozgan aktyor o‘zining xayriya jamg‘armasiga tegishli akkauntdan.