Homilador ayollar va nogironlarga bepul taksi xizmati ko‘rsatilmoqda

Urganch shahridagi «Xorazm Ravon trans» mas'uliyati cheklangan jamiyati xayrli ishlarni amalga oshirib kelmoqda - korxonaning yengil taksi haydovchilari bayram kunlari shahar ichi yo‘nalishlari bo‘ylab homilador ayollar va nogironlarni bepul o‘z manziliga yetkazadi. Bu haqida O‘zbekiston avtomobil va daryo transporti agentligi ma'lum qildi. 

Ushbu tashabbus Jamiyat rahbariyati va haydovchilarning o‘zlaridan chiqqan. Yil boshidan buyon har bir bayramda korxonaga qarashli yo‘nalishsiz taksi avtomobillari shahar hududida nogironlar va homilador ayollarga bepul xizmat ko‘rsatmoqda. Aholi bunday savobli ishni yo‘lga qo‘ygan avtotransportchilardan juda mamnun: haydovchilar ushbu «aksiya» yo‘lga qo‘yilganidan beri yo‘lovchilarning ularga nisbatan o‘zgacha hurmat bilan qaray boshlaganini, har qadamda maqtov va duolarga sazovor bo‘layotganlarini ta'kidlashmoqda. 

Shunisi diqqatga sazovorki, xayrli ishga qo‘l urilganidan keyin korxonaning pullik mijozlari soni ortib, tushum ham va tabiiyki, haydovchilarning daromadlari ham ko‘paymoqda. 

Ezgu ishlari orqasidan topilayotgan obro‘-e'tibor va barakadan ruhlangan «Xorazm Ravon trans» MChJ rahbariyati endilikda tug‘ruqxonadan «yangi mehmon» bilan chiqqan yosh onalarni uylariga bepul yetkazib qo‘yishni tashkil etish niyatida. «Har kim qurbi yetgancha savob ish qilganiga nima yetsin! Odamlarga yaxshilik qilsangiz, muhtojlarga yordam qo‘lini cho‘zsangiz, o‘zingiz ham ruhiy halovatga erishasiz. Shunday ekan, boshlagan xayrli ishlarimizni aslo to‘xtatib qo‘ymaymiz», – deydi korxona rahbari Odilbek O‘rozov.

«Xorazm Ravon trans» ko‘p yillardan buyon shaharda yo‘lovchi tashish faoliyati bilan shug‘ullanib kelmoqda. Hozirgi kunda korxona tasarrufida 26 ta yengil avtotransport vositalari mavjud.