Uch nafar turkiyalik tankchi IShIDga qarshi jangda halok bo‘ldi

Suriyada jangarilar uch nafar turkiyalik harbiyni o‘ldirdi. Bu haqda 9 sentabrda Turkiya qurolli kuchlari bayonotiga iqtibos keltirgan holda Reuters axborot agentligi xabar berdi. 

Yana bir turkiyalik harbiy yarador bo‘lgan. Jang tafsilotlari noma'lum. Faqatgina turkiyalik harbiylar tanki jangarilar tomonidan otilgan raketa bilan nishonga urilgani ma'lum qilingan.  

O‘z navbatida turkiyalik harbiylar havodan jangarilar tomonidan ishlatiluvchi 4 ta inshootni yo‘q qilishgan.

Bu qurbonlar Turkiya armiyasining Suriya hududidagi janglardagi birinchi qurbonlari emas. 6 sentabrda Suriyaning Al-Vaqf qishlog‘i yaqinidagi jangda ikki nafar turk askari halok bo‘lgan va yana besh nafari yaralangan. Jangarilar raketa yordamida Ozod Suriya armiyasi otryadlari hujumini qo‘llab-quvvatlagan turk armiyasining ikki tankini nishonga urishgan.