Joriy yilning 10-12 avgust kunlari Toshkent shahrida O‘zbekiston mustaqilligining 25 yilligi munosabati bilan “Go‘zal va betakrorimsan, muqaddas Vatanim, jonim senga fido, O‘zbekistonim” shiori ostida “Istiqlol farzandlari” yoshlar festivali bo‘lib o‘tadi.

Ushbu festival yoshlarni milliy istiqlol g‘oyalariga sadoqat, ona Vatanga muhabbat ruhida tarbiyalash, o‘sib kelayotgan avlodni har tomonlama qo‘llab-quvvatlash va rag‘batlantirish borasida yurtimizda olib borilayotgan davlat siyosatidan ularni xabardor qilish, yosh avlodda O‘zbekistonda amalga oshirilayogan demokratik islohotlarga daxldorlik hissini shakllantirish maqsadida an'anaviy tarzda o‘tkazilib kelinmoqda.

Tadbir festival ishtirokchilari tomonidan “Mustaqillik va ezgulik” monumenti poyiga gul qo‘yish bilan boshlanishi ko‘zda tutilgan. Festival davomida “Tarixiy xotirasiz kelajak yo‘q!”, mavzuidagi tadbirlar, davlat hokimiyati va boshqaruv organlarida “Mamlakatimizda qonuniylikni, huquq-tartibotni mustahkamlashda yoshlar hissasi” mavzuida uchrashuvlar, “Yoshlar siyosati – yoshlar nigohida” ilmiy-amaliy konferensiyasi, “Istiqlol farzandlari!” nomli maxsus tok-shou, O‘zbekiston Respublikasi Prezidenti I. Karimovning “Ozodlik havosidan to‘yib nafas olgan xalq o‘z yo‘lidan hech qachon qaytmaydi” va “Hayot sinovlariga toblangan Qashqadaryo eli har qanday yuksak marrani egallashga qodir” nomli kitoblari taqdimoti hamda “Vatanimga dil izhori!” nomli “25” aksiyasiga bag‘ishlangan ko‘rgazmaning tantanali ochilish marosimi bo‘lib o‘tadi.
Mazkur yoshlar festivali doirasida turli san'at namoyandalari bilan uchrashuvlar, anjumanlar hamda 12 avgust kuni “Turkiston” saroyida yosh san'at ustalarining gala-konserti tashkil etiladi.

Yoshlarning hayoti, yoshlarning ijodi, yoshlarning tashabbusi, yoshlarning nigohi, yoshlarning orzusi va yoshlik zavqi – bularning barchasi Yoshlar festivalida!