«Chelsi» jamoasi bosh murabbiyi Antonio Konte Xalqaro chempionlar kubogi doirasida «Real»ga qarshi kechgan va 2:3 hisobidagi mag‘lubiyat bilan tugagan o‘yindan keyingi fikrlarini bildirib o‘tdi.

«Dunyoning eng kuchli klublaridan biriga qarshi o‘ynash oson emasdi. Qolaversa 5 soatlik parvozdan keyin dam olish uchun yetarli vaqt bo‘lmadi. Men futbolchilar toliqqanini bilardim. Bu o‘yin biz uchun muhim edi. O‘yin orqali jamoa o‘yinida to‘p bilan harakatlanish va to‘psiz harakatlanish qay darajada farqli ekanini ko‘rib oldim. Agar biz jamoaviy bo‘lib to‘psiz harakatlanishni uddalay olmasak, yana bir qo‘rqinchli mavsumni o‘tkazamiz. Bugun himoya vakillari bir-birlarini tushunmay harakat qilishdi. Lekin mudofaa chizig‘iga e'tibor qaratish muhim. Avvalgi o‘yinlarimizda bunday kamchilik bo‘lmagandi.

Aytishim mumkinki, bugun futbolchilar to‘p bilan yaxshi harakatlanishdi, to‘psiz qolishganda esa buninga aksi bo‘ldi.

Diqqatni jamlash va kuchni o‘yinning to‘liq daqiqasiga teng taqsimlash o‘ta muhim. Men to‘psiz o‘ynash jismonan qanday og‘irligini tushunaman. Lekin biz buni uddalay olmasak, g‘alaba qozona olmaymiz. Agar tarkibdagi ba'zi futbolchilar himoyada yaxshiroq o‘ynashmasa, biz yutqazishda davom etamiz.

Mening vazifam — jamoa qurish. O‘zim ham futbolchi bo‘lganman va aytishim mumkinki, agar biz maydonda ham, uning tashqarisida ham yaxlit jamoaga aylana olmasak, muvaffaqiyat qozona olmaymiz. Biz bir butun oila bo‘lishimiz kerak. O‘tgan mavsumda shu narsa yetishmagandi. Agar bunga erisha olmasak, yana yutqazaveramiz», — deya Kontening so‘zlarini keltiradi «Chelsi»ning rasmiy sayti.

Manba: Tribuna.uz