Andijonga tashrif buyurgan adabiyot, san'at namoyondalaridan iborat targ‘ibot guruhlari kecha Oltinko‘l, Paxtaobod va Ulug‘nor tumanlarida bo‘lishdi. Mustaqil yurtimizning yigirma besh yilligi oldidan joylarda tashkil etilgan tadbirlar ko‘tarinki ruhda o‘tkazilmoqda. 

Mirishkor dehqoni va qo‘li gul hunarmandlari,  qo‘yingki, har sohada dong taratgan insonlari bilan mashhur Oltinko‘l tumanida mehmonlarni tantanali ravishda kutib oldilar. Bir qator kasb-hunar kollejlari, ixtisoslashgan maktab-internati va umumta'lim maktablarida aholi va yoshlar bilan o‘tgan samimiy mashvaratlarda shonli tariximizning chorak asrlik to‘yi bosh  mavzuga aylandi. 
Oltinko‘l Sanoat kasb-hunar kollejida targ‘ibot guruhini – ko‘zlari chaqnab turgan o‘quvchilar milliy liboslarda, andijoncha sho‘h raqslar bilan kutib olishdi. O‘quv muasassasida o‘tkazilgan muloqot davomida tug‘ilib o‘sgan zaminga sadoqat ruhida tarbiya topib, uning ravnaqi uchun bor kuch g‘ayratini sarflash ham qahramonlikning bir ko‘rinishi ekanligi haqida gapirildi. “Oltin qalam” sohibasi shoira Zamira Ro‘ziyevaning Vatanga sadoqat ruhi bilan yo‘g‘rilgan she'rlari, estrada xonandalari Shohruh Yuldashev va Abror Azizov ijrosidagi sho‘h qo‘shiqlar davraga fayz kiritdi.

Ko‘makay qishlog‘idagi 35 umumta'lim maktabida bo‘lib o‘tgan  uchrashuvda aholi vakillari  targ‘ibot guruhi a'zolari O‘zbekistonda xizmat ko‘rsatgan artist Gavhar Zokirova ijro etgan sahna asarlaridan zavqlangan bo‘lsalar, O‘zbekiston xalq shoiri To‘lan Nizom tomonidan yurt vasfini tarannum etuvchi she'rlarini tingladilar. Xonanda Tohir Usmonov tomonidan aytilgan qo‘shiqlar barchani davraga tortdi. 

Tumandagi targ‘ibot tadbirlarining  uzviy yakuni 3000 nafarga yaqin tomoshabin tashrif buyurgan “Markaziy” o‘yingohida o‘tkazildi. Dastur davomida el suygan san'atkor va adabiyotimiz namoyondalari chiqishlari yig‘ilganlarga ajoyib kayfiyat ulashdi. 

Tadbirlar davomida o‘tgan har bir lahza mustaqil diyorimiz insonlari qalbida bir umrga yodda qolishi aniq.

Fursatdan foydalanib, targ‘ibot guruhi safida Andijonga tashrif buyurgan san'atkorlarni suhbatga tortdik.

Gavhar Zokirova, O‘zbekistonda xizmat ko‘rsatgan artist:

- Biz bugun ozod va obod yurtda yashab, har kuni shukronalik bilan o‘tayotgan xalqimiz bilan uchrashdik. To‘g‘risi, o‘zi tug‘ilib o‘sgan zaminni sevishni mana shu insonlardan o‘rganishimiz kerak, aslida. Ular yuzidagi quvonch, bugungi kunidan faxrlanish tuyg‘usi bizni yanada shijoat bilan ijod qilishga undaydi.  Yurtimizga, uning istiqloliga ko‘z tegmasin!   

 

Tohir Usmonov, xonanda:

Bugungi uchrashuvlar davomida oltinko‘llik yoshlarning egallagan bilim va salohiyatini ko‘rib, to‘g‘risi rosa to‘lqinlanib ketdim. Darhaqiqat yurtimizning mana shunday shijoatli yoshlari bor ekan, mustaqil diyorimizning kelajagi albatta buyukdir.

 

Matn va suratlar muallifi – Elmurod Ermatov, Andijon.