Turkiya va Rossiya o‘rtasida munosabatlarning me'yorlashuv jarayoni boshlandi va ikki davlat to‘g‘ridan-to‘g‘ri muloqot qilishi uchun yo‘l ochildi. Bu haqida Turkiya tashqi ishlar vaziri Mavlyud Chovusho‘g‘li N-TV telekanaliga bergan intervyusida ma'lum qildi. 

"Rossiya va Turkiya davlat rahbarlarining suhbatidan keyin o‘zaro munosabatlar tiklana boshlandi. Ertadan boshlab Rossiya bilan to‘g‘ridan-to‘g‘ri muloqot o‘rnatiladi. Umid qilamanki, biz RF TIV rahbari Sergey Lavrov bilan ikki tomonlama aloqalarni ham, mintaqaviy muammolarni ham samimiy muhitda muhokama qilamiz", - dedi u. 1 iyul kuni Chovusho‘g‘li Qora dengiz iqtisodiy hamkorlik tashkilotining (OChES - Organizatsiya Chernomorskogo ekonomicheskogo sotrudnichestva) vazirlar uchrashuvida ishtirok etish uchun Sochiga yetib keladi hamda bu yerda Rossiya Federatsiyasi TIV rahbari Sergey Lavrov bilan uchrashadi. 

Chovusho‘g‘li mintaqaviy masalalar haqida so‘z yuritar ekan, Rossiya bilan Suriya muammosi to‘g‘risida muloqotni davom ettirish niyatida ekanligini bildirdi.

Shuningdek, vazir Suriya bilan bog‘liq bir qator masalalarda Turkiyaning faol ishtirokini ta'kidlab o‘tdi. 

"Biz doimo Rossiya va Eron Suriya inqirozining yechimini topishda muhim rol o‘ynashi va albatta bu jarayonga jalb etilishi kerakligini ta'kidlaganmiz. Bu pozitsiyamiz o‘zgarmadi", - dedi Turkiya tashqi ishlar vaziri.