Hollivud (Hollywood) aktyori Tom Kruz NASAda o‘tkazgan maxfiy mashg‘ulotlar chog‘ida bir o‘limdan qutilib qoldi, deb yozmoqda The Sun nashri.

Gazetaning yozishicha, Kruz «Kolumbiya» shattli ekipajiga qo‘shilishi mumkin bo‘lgan va shu maqsadda NASA tayyorgarligidan ham o‘tgan. Biroq missiyada qatnashish bo‘yicha yakuniy qaror qabul qila olmagani, uni o‘limdan saqlab qolgan. 

Ma'lumki, fazo kemasi 2003 yili halokatga uchragan va uning 7 nafar ekipaj a'zosi fojiali tarzda hayotdan ko‘z yumgan edi. 

Kruz bilan "Kosmik stansiya 3D” filmi ustida ishlagan rejissyor Toni Mayyersning aytishicha, akter astronavt bo‘lishni xohlagan va shattl bortida fazoga parvoz qilishni juda istagan. 

«Uning imkoniyatlari keng edi, ammo keyinroq fojia yuz berishi bilan hammasi tugadi», – degan Mayyers.