Moskvaning «Dinamo» jamoasi futbolchisi Andrey Yeshchenko shahar ko‘chalaridan birida noma'lum shaxslar tomonidan kaltaklangan. Bu haqda 22 may kuni sovsport.ru xabar tarqatdi.

Ma'lum qilinishicha, ushbu hodisa Nikita darvozasi maydonida ro‘y bergan. Manbaning ma'lumotiga ko‘ra, ichida futbolchi bo‘lgan Range Rover avtomobili maydonda to‘xtagan va keyin to‘polon boshlangan. Avtomobil haydovchisi va boshqa yo‘lovchilar bir necha daqiqa davomida futbolchini kaltaklashgan va keyin voqea joyidan ketishgan. Voqea joyiga politsiyachilar yetib kelishgan, jabrlanuvchi tergov-surishtiruv ishlari uchun mahkamaga olib ketilgan.

21 may kuni futbol bo‘yicha Rossiya chempionatining oxirgi turida «Dinamo» «Zenit»dan 0:3 hisobida mag‘lub bo‘ldi va o‘z tarixida ilk marta oliy divizionni tark etdi.

Joriy mavsumda Yeshchenko «Dinamo» safida 9ta uchrashuv o‘tkazdi. U joriy mavsumning ikkinchi davrasi arafasida «Anji» safidan ijara asosida moskvaliklar jamoasi tarkibiga kelib qo‘shilgandi.